Ditën e nesërme, në datën 17 prill, Partia Demokratike do të organizojë protestën e radhës para godinës së Kryeministrisë, e thirrur nga kreu i PD-së, Sali Berisha.

‘Risia’ e protestës së nesërme të PD-së është rikthimi i fjalimeve, pasi në disa tubime Berisha ka preferuar që t’i nxjerrë militantët e tij vetëm për shëtitje në bulevard. Duke parë se xhirot e Berishës dhe ithtarëve të tij në rrugët e Tiranës nuk kanë pasur asnjë efekt, por vetëm dhunë e kaos, kryedemokrati ka vendosur të ndryshojë kurs.

Përmes një njoftimi, Policia bën të ditur se ka ndërmarrë masat e nevojshme me qëllim mbarëvajtjen e tubimit. Ndër masat e ndërmarra nga Policia, është kufizimi i lëvizjes dhe ndalimi i parkimit të mjeteve që nga ora 23:45 e ditës së sotme dhe deri në përdundimin e tubimit, në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”;

Po ashtu, nga ora 15:00 e ditës së nesërme deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Gjithashtu, Policia i ka bërë thirrje qytetarëve që të distancohen në rast se gjenden përballë veprimeve të kundërligjshme që cenojnë rendin dhe sigurinë publike.

Njoftimi i Policisë:

DVP Tiranë-Përfaqësues të subjektit politik Partia Demokratike e Shqipërisë kanë njoftuar Policinë e Tiranës për zhvillimin e një tubimi, më datë 17.04.2026, nga ora 19:00 deri në orën 22:00, në bulevardin “Dëshmorët e Kombit”, para godinës së Kryeministrisë.

Në bazë të ligjit “Për tubimet”, Policia e Tiranës ka marrë masat me qëllim garantimin e mbarëvajtjes së tubimit në vendin dhe afatin kohor të kërkuar.

Në zbatim të këtyre masave, ditën e sotme dhe të nesërme, do të kufizohet lëvizja në disa akse/segmente rrugore, konkretisht:

nga ora 23:45 e datës 16.04.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”;

nga ora 15:00 e datës 17.04.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Policia e Tiranës apelon për organizatorët e tubimit për respektimin e afatit kohor dhe vendit ku do të zhvillohet tubimi, si dhe kërkon mirëkuptimin e qytetarëve për kufizimin e lëvizjes me automjete.

Gjithashtu, apelon që të distancohen në rast se gjenden përballë veprimeve të kundërligjshme që cenojnë rendin dhe sigurinë publike.