Kombëtarja shqiptare ka mbyllur përgatitjet në tokën 'mëmë' për ndeshjen e fundit në grupin e Ligës së Kombeve, që luhet të dielën kundër Bjellorusisë në Hungari.

Trajneri i Shqipërisë, Rolando Maran dhe mesfushori Kristjan Asllani në konferencë për shtyp e cilësuan Bjellorusinë si një nga kundërshtarët që i ka lodhur më tepër në këtë grup.

“Nuk ka asnjë lloj shqetësimi për mungesën e Ramadanit. Të gjithë janë në lartësinë për të luajtur me Kombëtaren. Ndoshta është momenti i duhur për të luajtur edhe lojtarë të tjerë. Është mundësi e mirë edhe për ta. Muçi nuk u stërvit sot me ekipin dhe mbetet për tu vlerësuar gjendja e tij.

Në fakt është kundërshtari që na ka lodhur më tepër në këtë grup. Ka pasur një ecuri të mirë dhe ka vetëm një humbje ndaj nesh. Do të jetë një ndeshje e vështirë, por jemi gati dhe të vendosur. Kemi krijuar një identitet si skuadër dhe djemtë janë gati për të dhënë maksimumin. Ne utemi në fushë për të dhënë më shumë seç mund të kemi bërë në ndeshjen e kaluar”, deklaroi Maran.

Asllani nënvizoi rëndësinë e kësaj përballjeje, duke bërë të qartë se objektivi i Shqipërisë është marrja e tri pikëve.

“Gjendja është shumë e mirë. Kemi bërë një seancë të mirë në mëngjes dhe besoj se jemi përgatitur mirë. Tani do ta studiojmë pak ekipin, sot ose nesër. Është një ndeshje shumë e rëndësishme. Na duhen tri pikët dhe do të luftojmë për ta fituar ndeshjen.

Do të hyjmë në fushë me shumë karakter dhe shumë agresivitet, sepse ata janë një ekip agresiv dhe shumë fizik. Na kanë vënë në vështirësi në Tiranë. Jemi përgatitur mirë dhe duam ta fitojmë këtë ndeshje. Tani po mendojmë vetëm për Bjellorusinë”,u shpreh Kristjan Asllani

Shqipëria vjen si kryesuese e grupit C1 në Ligën e Kombeve, me 12 pikë. Bjellorusia ndjek në vendin e dytë me 10 pikë. Kuqezinjve iu mjafton një barazim për të siguruar vendin e parë dhe ngjitjen në Ligën B, pasi kjo është ndeshja e fundit e grupit.