Gara e çiklizmit “Giro D’Italia” që po mbahet për herë të parë edhe në Shqipëri, parashikon një plan masash sigurie rrugore dhe rendi nga Policia e Shtetit dhe institucionet përgjegjëse.

Por ajo prek edhe ditën e zgjedhjeve, të dielën e 11 majit, në etapën që do zhvillohet në qytetin e Vlorës. Për këtë shkak janë parashikuar dhe njoftuar bllokime rrugësh dhe qarkullimi.

Nisur nga kjo ngjarje, dega e PS-së në Vlorë i ka kërkuar KQZ-së edhe zgjatjen e orarit të votimit në qytet nesër, deri në 22:00, nga 19:00 që parashikon Kodi Elektoral.

Shkresa është firmosur nga kreu politik i PS për qarkun Vlorë, Bledi Çuçi dhe Report Tv e Shqiptarja.com e kanë siguruar. Kjo shtyrje është kërkuar për shkak të Giro D’Italia në mënyrë që të mos pengohen qytetarët për të votuar.

Ndërkohë, PD ka dal kundër, ku përmes një kërkesë drejtuar KQZ, PD thotë se ky aktivitet, i organizuar nga vetë qeveria aktuale ka karakter të qartë propagandistik dhe shërben më shumë për qëllime elektorale dhe promovimi.

Kërkesa e PS Vlorë:

"Drejtuar: z. Ilirian Celibashi

Kryetar i Komisionit Qëndror të Zgjedhjeve

Lënda: Kërkesë për shtyrje të orarit të mbylljes së disa qendrave të votimit në Qarkun e Vlorës

I nderuar z. Celibashi

Në vijim të komunikimit me Bashkinë e Vlorës, ju informoj se në datën 11 Maj 2025, në territorin e kësaj Bashkie do të zhvillohet aktiviteti sportiv ndërkombëtar "Giro D'Italia". Masat e ndërmarra për organizimin e këtij eventi do të përfshijnë bllokimin e 14 akseve kryesore rrugore në qytetin e Vlorës dhe zonat përreth, shumica e të cilave do të qëndrojnë të bllokuara për më shumë se 4 orë. Sipas informacioneve të marra nga Bashkia e Vlorës, bllokimi i këtyre akseve rrugore do të ndikojë në aksesueshmërinë e 55 qendrave të votimit të kësaj Bashkie. Në përgjigje të kërkesës për informacion, Bashkia e Vlorës na ka vendosur në dispozicion një listë të detajuar të akseve rrugore që do të bllokohen dhe qendrave të votimit të cilat do të afektohen nga ky bllokim, të cilën mund ta gjeni bashkëlidhur kësaj shkrese.

Bazuar në këtë informacion dhe duke vlerësuar se lëvizja e qytetarëve drejt këtyre qendrave mund të jetë e vështirësuar apo e pamundur për një pjesë të ditës, kërkojmë që për të gjitha këto qendra të shtyhet orari i votimit deri në orën 22:00. Vlerësojmë se kjo shtyrje e orarit është e domosdoshme për të garantuar ushtrimin e së drejtës kushtetuese për të votuar dhe për të siguruar një proces zgjedhor të papenguar, ku çdo qytetar të ketë mundësi për të ushtruar të drejtën e tij për të zgjedhur.

Duke ju falënderuar për mirëkuptimin dhe bashkëpunimin,

Bledar Çuçi, Drejtues Politik i Partisë Socialiste Vlorë".

Rendit zhvillimet sipas orarit:
Ora 19:06
PS e Vlorës kërkoi shtyrjen e orarit të votimit për shkak të ‘Giro d’Italia’, PD kundër: Abuzim me procesin, zgjedhjet s’mund të përshtaten me orarin e propagandës qeveritare

1745949695_partiademokratike.jpg

Për shkak të garës Giro d’Italia, një nga etapat e të cilës do të zhvillohet nesër në Vlorë, dega e PS-së në Vlorë i kërkoi KQZ-së zgjatjen e orarit të votimit në qytet deri në 22:00, nga 19:00 që parashikon Kodi Elektoral.

Por PD ka dal kundër, ku përmes një kërkesë drejtuar KQZ, PD thotë se ky aktivitet, i organizuar nga vetë qeveria aktuale ka karakter të qartë propagandistik dhe shërben më shumë për qëllime elektorale dhe promovimi.

‘Duke iu referuar kërkesës së paraqitur nga Partia Socialiste për shtyrjen e orarit të votimit në disa qendra në qytetin e Vlorës, për shkak të zhvillimit të aktivitetit sportiv “Giro d’Italia”, ju informojmë se Partia Demokratike – Aleanca për Shqipërinë Madhështore (PD–ASHM) është kategorikisht kundër këtij propozimi. Ky aktivitet, i organizuar nga vetë qeveria aktuale në ditët më kritike të fushatës zgjedhore, përfshirë ditën e heshtjes dhe tani edhe ditën e zgjedhjeve, ka karakter të qartë propagandistik dhe shërben më shumë për qëllime elektorale dhe promovimi. Të shpenzosh mbi 7 milionë euro nga fondet publike për një shfaqje të tillë, dhe më pas të kërkosh edhe shtyrje të orarit të votimit për t’ia përshtatur agjendës së kësaj ngjarjeje, është një abuzim i papranueshëm me procesin zgjedhor.

Duhet shtuar se për dy ditë me radhë është ndaluar lëvizja e lirë në territorin e Tiranës, janë pamundësuar aktivitetet politike të opozitës dhe i është mohuar e drejta kushtetuese subjekteve politike për të komunikuar me qytetarët në ditët vendimtare të fushatës. Ky precedent shkel parimet themelore të një procesi të lirë dhe të ndershëm zgjedhor.

Qëndrimi ynë është i qartë: zgjedhjet nuk mund të përshtaten me orarin e propagandës qeveritare. Është procesi zgjedhor që duhet të ketë përparësi absolute. Nëse aktiviteti sportiv bie ndesh me rregullsinë e zgjedhjeve, atëherë përgjegjësia bie mbi organizatorët dhe jo mbi qytetarët apo institucionet zgjedhore.

Për më tepër, një ndërhyrje e tillë e kërkuar nga PS vetëm pak orë para zgjedhjeve, cenon besueshmërinë e procesit dhe krijon precedent të rrezikshëm për të ardhmen. Kjo nuk është thjesht një çështje orari është një çështje parimi dhe standardi demokratik. PD–ASHM kërkon me forcë që kërkesa e PS të mos merret në konsideratë nga Komisioni Qendror i Zgjedhjeve. Çdo vendimmarrje në këtë drejtim do të konsiderohej nga ana jonë si një ndërhyrje e papranueshme në barazinë e garës dhe një minim i rëndë i integritetit të zgjedhjeve jo vetëm në qytetin e Vlorës, por në të gjithë qarkun.

 

S.B/Shqiptarja.com