New York, “Amnistia” premierë në MOMA

Filmi “Amnistia” tërhoqi vëmendjen e publikut amerikan pas shfaqjes së dy ditëve më parë në MOMA (Muzeu i Artit Modern) në New York dhe pritet të rishfaqet në datën 20 janar sërish në të njëjtat mjedise. Siç shkruajnë mediat amerikane, filmi premierë në MOMA sjell imazhet e një kulturë tipike ballkanase me një kast aktorësh të rinj, por të talentuar. Pasi fitoi çmim në Berlinale dhe 3 të tjera nga juri ndërkombëtare, filmi është zgjedhur si kandidatura e Shqipërise për çmimet Oscar. Filmi me regji dhe skenar të Bujar Alimanit ka si protagonistë aktorët Luli Bitri, Karafil Shena, Todi Llupi, Mirela Naska, Omer Hamitaj, Orest Arapaj, një produksion i Qendrës Kombëtare Kinematografike me partnerë Greqinë dhe Francën.