Nga arratia Becchetti con në gjyq
edhe dy banka, kërkon 350 mijë euro

TIRANË - Biznesmeni italian Francesko Becchetti, edhe pse ndodhet në arrati, sërisht nuk ndalet nga dëshira për t’u marrë para bankave, nëpërmjet padive civile në gjykatë. Gjykata e Tiranës i ka kthyer mbrapsht një kërkesë civile Becchettit, i cili nëpërmjet kompanisë “Kalivaç Green Energy” i ka kërkuar bankës “Intesa San Paolo” një shumë prej 350 mijë euro.

Në padinë civile, Becchetti ka paditur njëherësh dhe bankën “BANCA IMI”, s.p.a me seli në Milano. Kjo kërkesë e Becchettit nuk është pranuar nga Gjykata e cila ka vendosur të kthejë mbrapsht aktet e padisë civile. Në seancën e datës 2 shkurt 2016, ora 13:30, pala paditëse paraqiti kërkesë paraprake për thirrjen e një personi të tretë dhe me kërkesë të palëve të paditura për t’u njohur dhe për të mbajtur një qëndrim në lidhje me të.

Ndërkohë në seancën e datës 3 mars 2016, pas marrjes së vendimit nga gjykata në lidhje me këte kërkesë, pala paditëse vazhdoi me shpjegimet në lidhje me kërkimet e padisë. Nisur nga kjo situatë nga ana e gjykatës, pasi u dëgjua edhe shpjegimi i përfaqësueses së palës paditëse për kërkimet e padisë, u konstatua se padia kishte të meta në lidhje me saktësimin e figurave të dëmit. Vlera e pretenduar në lidhje me këto figura dëmi, përcaktimi dhe shpjegimi i llojit të dëmit dhe pagimi për të tre këto vlera i taksës prej 1%.

Përfaqësuesja e palës paditëse kërkoi 2 javë kohë për plotësimin e tyre,dhe në këto kushte nga gjykata u vendos ndërprerja e seancës gjyqësore,  duke i lënë kohë kësaj pale për këtë arsye deri në datë 17 shkurt 2016.Sërisht në 17 shkurt u paraqitën vetëm përfaqësuesit e palës së paditur, ndërsa pala paditëse nuk u paraqit, me pretendimin se nuk mund të shkonte në gjyq për shkak të gjëndjes shëndetësore.

Edhe pse avokati, kishte munguar në gjykatë, kjo e fundit në vendimin e saj ka argumentuar se plotësimi i të metave të padisë duhej të ishte bërë nga pala paditëse. Ndërkohë në datën 24 shkurt 2016 nuk është paraqitur asnjë nga palët në këtë proces.Shkak i mungesës, së avokatëve është bërë vendimi i Dhomës së Avokatisë për bojkotimin e seancave gjyqëosre.

Mirëpo pavarësisht kësaj, gjykata ka argumentuar se avokatët e Becchettit duhet të kishin plotësuar të metat e padisë brenda këtij afati,  dhe sipas gjykatës nuk ka asnjë arsye pse duhej të priste momentin e seances, duke pasur parasysh edhe faktin që,ky afat i është dhënë për herë të dytë. Sipas gjykatës “Kalivaç green energy” nëpërmjet një avokati tjetër mund të kishte plotësuar këto të meta para apo edhe në momentin e fundit të tij, që ishte seanca gjyqësore.

Redaksia Online
(E.Ç./shqiptarja.com)

TAG:
• francesko becchetti