Për të dytën ditë, administrata e Gjykatës së Tiranës, dhoma civile dhe penale bojkotoi punën dhe nuk ofroi shërbime.

Nën të njëjtin shembull, edhe në disa gjykata të tjera të vendit nisi reagimi për shkak të bllokimit të pagave nga Thesari, pas ngërçit të krijuar me përllogaritjen e rrogave të sistemit të drejtësisë.

Në Fier, sekretariati dhe administrata kanë bojkotuar punën, ndërsa shërbimet ofrohen vetëm për seancat gjyqësore me karakter urgjent për masat e sigurisë.

Kjo ka shkaktuar edhe pakënaqësitë e para. Avokati Jurid Sharka thotë se qytetarët duhet të ishin njoftuar paraprakisht.

“Bojkoti është i drejtë, në zbatim të të gjitha kritereve ligjore që përcaktohen në kushtetutën shqiptare, por që do ta mbështesin bojkotin duke marrë masa paraprake për njoftimin e zhvillimit të këtij bojkoti”, thotë ai.

Ndërkohë vetë gjykata ka bërë gjatë ditës një njoftim mbi bojkotin duke thënë se nuk ende një vendim se kur do të përfundojë.

Sportelet që ofrojnë shërbim për qytetarët u mbyllën edhe në Vlorë. Ato do të funksionojnë vetëm me orare të reduktuara në mesditë për çështjet urgjente.

Gjatë ditës nuk u zhvillua as një seancë gjyqësore ndërsa gjykata nuk ka ende një afat se deri kur nuk do të vijohet me bllokimin e seancave gjyqësore.

Rreth 35 punonjës të administratës së Gjykatës Administrative të Shkallës së Parë në Lushnjë bojkotuan punën për rreth dy orë. Punonjësit kërkojnë që t’u kalojë paga e muajit, e cila duhej të ishte marrë më datë 3 shtator. Ata paralajmërojnë se protesta do të përsëritet edhe në ditët në vijim, deri në momentin që pagat të kalojnë.

Bllokimi i pagave erdhi pas vendimit të KLGJ dhe KLP për të përcaktuar vetë pagat e gjyqtarëve dhe prokurorëve në kushtet kur Kuvendi nuk i dha zgjidhje detyrimit për ripërllogaritjen e pagave pas vendimit të Gjykatës Kushtetuese. 

Ndërkohë të enjten pritet që të ketë një mbledhje të jashtëzakonshme të gjyqtarëve. Edhe Prokurori i Përgjithshëm, Olsian Çela, mblodhi dje drejtuesit e prokurorive, përfaqësues të KLP-së dhe Shoqatën e Prokurorëve.

Në takim u theksua nevoja për një zgjidhje të shpejtë nga Kuvendi, në respektim të vendimit të Gjykatës Kushtetuese.

Rendit zhvillimet sipas orarit:
Ora 12:18
Ngërçi me pagat në drejtësi, administrata e Gjykatës Administrative në Lushnjë 2 orë bojkot (VIDEO)

 

Rreth 35 punonjës të administratës së Gjykatës Administrative të Shkallës së Parë në Lushnjë kanë bojkotuar sot punën për rreth dy orë.

Punonjësit kërkojnë që t’u kalojë paga e muajit, e cila duhej të ishte marrë më datë 3 shtator.

Sipas tyre, vonesa e pagave lidhet me procesin e shqyrtimit të rritjes së pagave të gjyqtarëve, ndërsa kjo situatë ka sjellë vonesa edhe për administratën e gjykatës.

Bojkoti i sotëm zgjati vetëm dy orë, por punonjësit paralajmërojnë se protesta do të përsëritet edhe në ditët në vijim, deri në momentin që pagat të kalojnë.

Administrata kërkon zgjidhjen e situatës dhe marrjen e pagave që u takojnë, duke shprehur shqetësimin për vonesat në pagesat mujore.

SI.E./Shqiptarja.com

Ora 12:17
Ngërçi me pagat në drejtësi, edhe Gjykata e Vlorës mbyll dyert! Administrata në bojkot, shërbim për qytetarët vetëm 15 minuta në ditë

Vetëm 15 minuta shërbim në ditë ofron administrata në Gjykatën e Vlorës. Më tej, sportelet mbyllen.

“Kemi marrë rrogën e korrikut në fillim të gushtit, llogarit që ishin dhe pushimet e para. Tani presim rrogën e gushtit që ta marrim dhe s'e kemi marrë. Jemi pjesë e gjykatës domethënë punonjësit mbështetës që ne marrim një pagë minimale dhe rroga na duhet. Fëmijët i kemi në shkollë, i kemi shumë të nevojshme.”

“Kemi dalë sepse nuk dimë çfarë të bëjmë”, shprehen punonjësit.

Në Gjykatë, po shqyrtohen vetëm masat e sigurisë, ndërsa seancat e tjera janë pezulluar, në mungesë të sekretares apo punonjësve të tjerë të administratës, me role të domosdoshme gjatë zhvillimit të proceseve gjyqësore.

“Janë në të drejtën e tyre për të kërkuar në fund të fundit shpërblimin për punën që kanë bërë. Kjo nuk është me interes as të gjyqësorit dhe as të qytetarëve sepse ne ishim në pushim gjatë gushtit. Ishim në stok me vendimet e gjykatës. Këto ditë ky stok do rritet”, tha kreu i Dhomës së Avokatisë së Vlorës, Durim Bajrami.

Kjo është dita e dytë që administrata e Vlorës bllokon punën në pritje të një përgjigjeje se kur do të mund të marrin pagat.

Të parët që çelën bojkotin, ishin punonjësit në gjykatën e Tiranës, të cilët ende nuk kanë nisur të ofrojnë shërbime, përveç çështjeve urgjente. Edhe disa gjykata të tjera në vend kanë bojkotuar punën për vonesën e pagave.

SI.E./Shqiptarja.com

Ora 11:18
Ngërçi me pagat, edhe administrata e Gjykatës së Fierit në bojkot! Avokati: Qytetarët duhet të ishin njoftuar që s’do të ketë shërbime (VIDEO)

Edhe administrata e Gjykatës së Fierit ka nisur bojkotin pas ngërçit të krijuar me pagat në sistemin e drejtësisë. Asnjë shërbim nuk po ofrohet për qytetarët dhe do të zhvillohen vetëm seancat për masat e sigurisë. Një avokat, Jurid Sharka tha se e mbështet bojkotin, por sipas tij qytetarët duhet të ishin njoftuar paraprakisht se nuk do të ketë shërbime.

“Në një mënyrë të papritur, janë njoftuar qytetarët që do ketë bojkot, nuk do ketë as shërbim sekretarie as procese gjyqësore, përveç masave të sigurisë. Procese të tjera është vendosur të mos zhvillohen dhe ka ardhur në një formë të papritur. Bojkoti është i drejtë, në zbatim të të gjitha kritereve ligjore që përcaktohen në kushtetutën shqiptare, por që do ta mbështesin bojkotin duke marrë masa paraprake për njoftimin e zhvillimit të këtij bojkoti”, tha avokati.

SI.E./Shqiptarja.com