Nis Dita e bashkëpunimit rajonal
fokusi tek zgjerimin në Ballkan

Ka filluar sot në Bruksel Dita e bashkëpunimit rajonal me një konferencë të nivelit të lartë për bashkëpunimin dhe zgjerimin në Ballkanin Perëndimor, ku u përfshinë Ministri i Jashtëm shqiptar, Ditmir Bushatin, Komisioneri i BE-së për Fqinjësinë Evropiane dhe Negociatat e Zgjerimit, Johanes Hahn, Krytari i Përfaqësimit të shtetit të Baden-Württemberg-ut, Johanes Jung dhe Sekretari i Përgjithshëm i Këshillit për Bashkëpunimin Rajonal (KBR), Goran Svilanoviç.
 
Të pranishmit u njohën me faktin se Ballkani Perëndimor duhet të bëjë ende më shumë për të mbyllur boshllëqet ndërmjet ambicieve të tij dhe kapaciteteve aktuale; zhvillimi i mëtejshëm i bashkëpunimit rajonal është një prioritet për vetë rajonin dhe për Bashkimin Evropian, si dhe të qënit të lidhur është një nga nxitësit kyç të zhvillimit dhe punësimit në Evropën Juglindore.
 
Përpara konferencës së nivelit të lartë, KBR-ja, Fondi Evropian për Ballkanin dhe Përfaqësuesi i shtetit të Baden-Württemberg-ut, tre organizatorët e Ditës për bashkëpunimin rajonal, prezantuan një mini koncert me tre divat e muzikës etno ballkanike: Bilja Krstic, Amira Medunjanin dhe Tamara Obrovac: Femrat e Ballkanit (Les Femmes des Balkans).
 
Më herët gjatë ditës, Barometri i Ballkanit (BB) bëri prezantimin e parë publik të tij. BB-ja është një anketim gjithpërfshirës që përfshin opinionin e publikut dhe të biznesit dhe ndjesinë në lidhje me çështjet më të rëndësishme ekonomike dhe të zhvillimit. Ai është pjesë e një “mjeti” të KBR-së për ndjekjen e ecurisë së zhvillimit të Strategjisë për Evropën Juglindore 2020 (SEE 2020). Barometri i Ballkanit 2015 mund të shihet në faqen e internetit të KBR-së

http://www.rcc.int/seeds/results/2/balkan-opinion-barometar,
dhe
http://www.rcc.int/seeds/results/3/balkan-business-barometar.
 
Dita e bashkëpunimit rajonal vazhdon gjatë pasdites me një panel diskutimi mbi zgjerimin, rritjen ekonomike dhe qeverisjen, si dhe me një panel të dytë mbi zgjerimin dhe të qënit të lidhur, dhe lidhjet me Procesin e Berlinit dhe samitin e Vjenës, në Gusht të këtij viti.
 
Dita e bashkëpunimit rajonal është një përpjekje e përbashkët e KBR-së, Përfaqësuesit të shtetit të Baden-Württemberg-ut në BE dhe e Fondit Evropian për Ballkanin.

Redaksia online
(f.m/shqiptarja.com)