POP 5

Lajmet më të lexuara të 5 minutave të fundit

Ekonomi

Nis procesi i licencimeve për
internetin 4G në telefonat celularë

Së shpejti mund të hapet tenderi për frekuencat e teknologjisë më të fundit për internetin në telefoninë e lëvizshme.
TIRANE- Së shpejti mund të hapet tenderi për frekuencat e teknologjisë më të fundit për internetin në telefoninë e lëvizshme. Ndryshe nga deri tani, risia është që të katër operatorët e pranishëm në treg mund të marrin njëherësh katër licensa dhe që tarifa që do të kërkojë shteti duket se do të jetë shumë më e ulët se në teknologjinë e mëparshme.

Autoriteti i Komunikimeve Elektronike dhe Postare (AKEP) i ka dërguar tashmë ministres së Inovacionit propozimin për të hapur tenderin e dhënies së frekuencave që do të përdoren për teknologjinë 4G. Pas përfundimit të konsultimit publik, AKEP ka vendosur kushtet dhe procedurat e garës për dhënien në përdorim të brezave të frekuencave 1900-1980 MHz dhe 2110-2170 MHz, që duhet të marrin miratimin e dikasterit të linjës, për të nisur zyrtarisht prokurimin.

Teknikisht, AKEP vlerëson se për këto breza mund të jepen deri në katër të drejta përdorimi, çka do të garantonte akses në to për të katër operatorët celularë në të njejtën kohë.
Vlera minimale që do të kërkohet për marrjen e licensave nuk bëhet publike, por dhënia e njëkohshme e katër liçensave nënkupton se nuk do të ketë një garë të mirëfilltë dhe shumat e arkëtuara nga shteti nuk pritet të jenë të krahasueshme me ato të arkëtuara në kohën e qeverisë Berisha, kur u dhanë licensat 3G, kur nga tre operatorë buxheti i shtetit arkëtoi afro 52 milionë euro.
Plani kombëtar i radiofrekuencave parashikon që brezat në fjalë të përdoren për shërbimet IMT, që i takojnë gjeneratës 4G dhe që garantojnë shpejtësi të internetit dhe transmetimit të të dhënave të cilat teorikisht mund të arrijë deri në 1 Gbps.

Përveç kësaj, AKEP tashmë ka vendosur të ndërmarrë liberalizim të shërbimeve në të gjitha brezat, çka nënkupton se operatorët do të jenë të lirë të ofrojnë shërbimet dhe teknologjitë që dëshirojnë, pa u kufizuar në kushtet e autorizimit individual. Pra, edhe në brezat që operatorët i kanë tashmë në përdorim, mund të ofrohen shërbime 4G, ndonëse ato nuk mjaftojnë për të përmbushur të gjitha nevojat e operatorëve.

Ndërkohë, ka përfunduar afati që ka vendosur AKEP për regjistrimin e numrave telefonikë celularë. Të gjithë numrat celularë të ndërmarrjeve, institucioneve apo grupeve të tjera duhet të regjistroheshin në emër të përdoruesve individualë të tyre deri më 15 maj. Autoriteti i Komunikimeve Elektronike dhe Postare ka njoftuar që në muajin shkurt se të gjithë pjesëtarët e grupeve me mbi 20 numra celularë duhet të paraqiteshin pranë kompanive për të bërë regjistrimin në emrin e secilit abonent. Kjo masë e AKEP erdhi pas kërkesës së Ministrisë së Brendshme, për shkak të problematikës së krijuar në rendin publik nga përdorimi i aparateve celulare për shpërthimet e telekomanduara.

Redaksia Online
(d.a/shqiptarja.com)

/Shqiptarja.com
  • Sondazhi i ditës: 13 Janar, 10:25

    Nisi regjistrimi, a do të marrë pjesë masivisht në zgjedhje diaspora?

Lajme të tjera



×

Lajmi i fundit

Efektivi bie nga lartësia e pallatit në Tiranë, dërgohet te Trauma! Nuk dihen shkaqet

Efektivi bie nga lartësia e pallatit në Tiranë, dërgohet te Trauma! Nuk dihen shkaqet

15 Janar, 18:35