Nis rehabilitimi i Unazës së Mesme e shtimi i korsive për biçikletat, Veliaj: Do vijojmë ritmin e modernizimit me Teatrin e ri

Nis rehabilitimi i Unazës së Mesme e shtimi i korsive për biçikletat, Veliaj: Do vijojmë ritmin e modernizimit me Teatrin e ri

Kryebashkiaku Erion Veliaj gjatë inspektimit të punimeve në Unazën e Mesme

Bashkia e Tiranës ka nisur projektin për rehabilitimin e Unazës së Mesme, me qëllim përmirësimin e sistemit të qarkullimit për automjetet dhe shtimin e korsive për biçikleta.

Gjatë inspektimit të punimeve që po kryhen në disa segmente të Unazës, pranë Njësisë Nr. 7 në kryeqytet, kreu i Bashkisë së Tiranës, Erion Veliaj, theksoi se ndryshimi vjen pasi vihet dorë dhe shprehu bindjen se Tirana do të vazhdojë me këtë ritëm të modernizimit edhe për Teatrin e ri Kombëtar dhe Piramidën.

E patëm një alternativë që s’prekte gjë me dorë dhe flinte gjumë. E kishim katër vjet dhe e dimë si përfundoi. Jam shumë i bindur se Tirana do të vazhdojë ritmin e modernizimit. Siç kishim debat për Parkun e Liqenit, ja ku është sot; siç kishim debat për Pazarin e Ri, ja ku është sot; siç kishim debat për sheshin “Skënderbej”, ja çmimet që po merr sot; siç kishim debat për Bulevardin e Ri, ja aksi i hapur për Tiranën e 50 viteve në vazhdim. Ashtu do të kemi edhe një Teatër të ri, do të kemi një Piramidë të re. Vënia dorë në qytet sjell progres, ndryshim, modernizim dhe prosperitet për Tiranën.

Kryebashkiaku Erion Veliaj

Ai solli në vëmendje shembujt e mëparshëm të disa prej projekteve të nisura në kryeqytet, të cilat hasën rezistencë, por sot janë ndër më të vlerësuarat.

E di që do kemi gjithmonë debate për punët e mëdha në Tiranë. Mbaj mend, përpara 3 vitesh kur sapo morëm mandatin për të qeverisur dhe për ta ndryshuar Tiranën, për ta kthyer në punë, një nga ankesat ishte: S’kemi shesh, s’kemi Pazar, s’kemi teatër, s’kemi bulevard. Tani që fillojmë t’i bëjmë këto punë, del një tjetër lloj lëvizje e cila thotë: Mos ma prek liqenin, mos ma prek parkun, mos ma prek bulevardin, mos ma prek sheshin, mos ma prek pazarin, mos ma prek teatrin. Pyetja është: Nëse duam ndryshim! Por, si bëhet ndryshimi nëse s’i prekim gjërat me dorë? Tirana sot është padyshim qyteti më i vlerësuar dhe me më shumë çmime në Ballkan.

Kryebashkiaku Erion Veliaj

Veliaj deklaroi se kur të gjithë bashkëpunojnë dhe nuk pengojnë njëri-tjetrin duke humbur kohë, gjërat ercin përpara.

Fakti se edhe në vendin tonë me ekonomi modeste, arrijmë ta ngrejmë reputacionin e qytetit, do të thotë se gjërat i kemi vetë në dorë; kur bashkëpunojmë ecim përpara, kur pengojmë njëri-tjetrin, sigurisht që humbasim kohë të çmuar. Unë jam i bindur se Tirana nuk ka më kohë për të humbur, ndaj do të vazhdoj me modernizimin e qytetit.

Kryebashkiaku Erion Veliaj

Lidhur me projektin për rehabilitimin e Unazës së Mesme të qytetit, Veliaj nënvizoi se kantieri i hapur sjell për kryeqytetin një revolucion në mënyrën e transportit publik.

Kantieri që është hapur sot është një kantier fantastik sepse sjell një revolucion në mënyrën e transportit publik në Tiranë. Duke filluar nga Brryli, te Ministria e Jashtme e deri te “Vasil Shanto”, pjesa e korsisë së lumit të Lanës do të jetë e dedikuar për biçikleta, ndërsa pjesa tjetër për transportin publik dhe makinat private. Autobusi do të ketë korsi të dedikuar në ato pjesë të Unazës ku zakonisht ka edhe trafikun më të madh ose ka edhe më shumë semaforë. Duke bërë këto ndërhyrje, inkurajojmë një transport alternativ.

Kryebashkiaku Erion Veliaj

Kreu i Bashkisë u shpreh se është inkurajues fakti që ndërtimi i korsive për lëvizjen me biçikleta ka shtuar edhe numrin e përdoruesve të dyrrotakëve në kryeqytet. Ai shtoi se kjo periudhë e verës do të shfrytëzohet maksimalisht për përfundimin e një sërë investimesh të rëndësishme, në mënyrë që kur qytetarët të kthehen nga pushimet, të gjejnë një Tiranë tërësisht të transformuar.

I kemi dhënë një ritëm të jashtëzakonshëm punëve në Tiranë. Po shfrytëzojmë maksimalisht korrikun, gushtin, kur Tirana është pak më e lirshme, duke qenë se njerëzit ikin me pushime, që bashkia të jetë në krye të detyrës dhe punët që mund të ishin bërë në mars e në prill, të cilat u vonuan prej shirave, t’i kompaktojmë gjatë periudhës së pushimeve, që kur qytetarët të kthehen në shtator të gjejnë një Tiranë totalisht të transformuar.

Kryebashkiaku Erion Veliaj

Investimi parashikon ndërhyrjen në disa segmente të Unazës për përmirësimin e qarkullimit të automjeteve në disa kryqëzime, duke realizuar një korsi të dedikuar për biçikleta përgjatë bulevardit ”Zhan D’Ark” dhe bulevardit ”Gjergj Fishta”, si dhe duke riasfaltuar segmentet e amortizuara të Unazës së Mesme. Projekti përfshin ndërhyrjen dhe përmirësimin e disa kryqëzimeve si më poshtë:

1. Kryqëzimi i rrugës "Muhamet Gjollesha" me rrugën "Myslym Shyri"
2. Kryqëzimi i rrugës "Jordan Misja" me rrugën "Asim Vokshi"
3. Kryqëzimi i Bulevardit "Zogu I" me rrugën "Reshit Petrela"
4. Kryqëzimi i rrugës "Arkitekt Kasemi" me bulevardin "Zhan D'Ark"
5. Kryqëzimi i Rrugës "5 Maji" me rrugën "Ferit Xhajko"
6. Kryqëzimi i Rrugës "Bardhyl" me rrugën "Kongresi i Manastirit"
7. Kryqëzimi i Rrugës "Siri Kodra" me rrugën "Ferit Xhajko"
8. Korsitë e Biçikletave në BLV "Zhan D'Ark" dhe BLV "Gjergj Fishta"

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Bumerangu: 16/07/2018 17:04

    ..Gjithe Unaza e vjeter e Tirones..,duhet te kete Korsi te Dedikuar per Autobusin e Unazes...,dhe po e Njejta le te perdoret dhe nga Bicikletat..,duhen te rregullohen te gjitha Kryqezimet...,dhe aty ku duhet prishur ...ndo1 ndertim...,le te shpronesohet per Interes publik!!!Per mua ka nevoje edhe per

    Përgjigju
  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

2 ‘kryetarë’ në burg, Këshilli Bashkiak i Himarës komandon Blerina Balajn si kryebashkiake

2 ‘kryetarë’ në burg, Këshilli Bashkiak i Himarës komandon Blerina Balajn si kryebashkiake