Lexova me vëmendje mesazhet e deklarimeve të sotme të kryeministrit dhe të Bashkisë së Tiranës.

Në gjykimin tim, duke marrë në konsideratë situatën politike dhe zgjedhjet vendore që po trokasin, qëndrimet e pazakonta të sotme janë dy gabime në një ditë.

Në komunikimin e brendshëm, PS-ja duhet t’i kthehet gjuhës konstruktive dhe përpjekjes për mirëkuptim, si dhe të heqë dorë nga armiqësitë për karrierë personale, nga gjuha e forcës dhe nga mesazhet kërcënuese e frikëndjellëse.

Ndërkritika nuk ka pse të shoqërohet me nota nervozizmi që natyrshëm perceptohen si shfaqje dobësie nga kundërshtarët tashmë të shtuar të partisë sonë.

E vetmja trimëri që na vlen sot është ndershmëria.

E vetmja qëndrueshmëri që na vlen është të mbrojmë Republikën nga politika e re me kapuçë dhe maska.

I vetmi reflektim që na vlen është të mirëkuptojmë kërkesat racionale të çdokujt që ka protestuar me qytetari në muajt e fundit.

I vetmi kohezion që na vlen është ai që buron nga besimi në vlerat e qytetarisë, solidaritetit, progresit dhe integrimit europian.