Nis rikonstruksioni i godinës Nr.24 në Qytetin Studenti

Pas rikonstruksionit të 10 konvikteve të para, Bashkia e Tiranës ka nisur ndërhyrjen për transformimin rrënjësor edhe të godinës Nr. 24 në Qytetin Studenti. Punimet në këtë fazë të parë janë përqendruar në mjediset e përbashkëta, ato higjeno-sanitare, korridore, tarraca dhe fasada e godinës. Kryetari i Bashkisë së Tiranës, Erion Veliaj inspektoi punimet që po kryhen në këtë konvikt, ndërsa shprehu mirënjohjen për sipërmarrësit privatë, që edhe këtë herë treguan përgjegjësi të madhe sociale, duke iu bërë krah Bashkisë së Tiranës dhe qeverisë për të përmirësuar kushtet e jetesës së studentëve.

“Tani që bëjmë bilancin dhe kriza ka kaluar, e që po numërojmë konviktin e 11-të që po rikonstruktohet, duket kollaj, por nuk do të ishim këtu nëse nuk do ishte dashamirësia, bujaria dhe solidariteti i të gjitha kompanive. Pavarësisht se nuk kanë asnjë detyrim e pavarësisht se paguajnë taksa, e pavarësisht se për ta dhe industrinë e ndërtimit taksa është 10-fishuar, do të thotë që kur dikush e ndjen përgjegjësinë sociale bëhet solidar, pavarësisht detyrimeve të tjera ligjore e taksative që ka”, tha Veliaj.

Kryebashkiaku siguroi se pas përfundimit të punimeve në mjediset e përbashkëta, gjatë verës do të vijojë faza e dytë e rehabilitimit të dhomave ku jetojnë studentët. “Ky është një moment i shkëlqyer për Tiranën dhe studentët. Sot jemi në një situatë kur, jo vetëm kanë mbaruar 11 konvikte, por besoj që me lirimin e konvikteve gjatë pushimeve të verës, do kemi mundësi ideale për të ndërhyrë nëpër dhoma dhe për mobilimin e tyre. U jam sot shumë mirënjohës studentëve që respektuan pjesën e tyre të Paktit me Universitetin: Ne morëm përsipër detyrimet tona, ata morën përsipër detyrimet e tyre. Ftesa për studentët është të mbajmë paktin siç e kemi nisur, e siç po shohim, të paktën në Tiranë premtimi po mbahet, çdo javë nga një konvikt”, u shpreh Veliaj.

Ai theksoi se ndonëse Pakti për Universitetin ia lë përgjegjësinë e prodhimit të kartës së studentit universiteteve, Bashkia e Tiranës do të marrë përsipër që ta prodhojë vetë atë, shoqëruar me një sërë shërbimesh që ofrohen falas ose me tarifa të reduktura.

“Ligji e kërkon që secili universitet të prodhojë kartën e vet; megjithatë, duke qenë se universitetet ose ata që i administrojnë ato, pra rektorët e dekanët, nuk kanë qenë të aftë ta bëjnë, ne do jemi bashkia e parë e cila do të prodhojë kartën e studentëve, duke qenë se tashmë 40 shërbime i kemi me kosto më të ulët. Do të bëjmë një prezantim dhe besoj që me mbajtjen e fjalës për kartën, me mbajtjen e fjalës për konviktet, i kemi dhënë sot një përgjigje pozitive të gjithë marrëveshjes dhe Paktit të Universitetit me studentët”, shtoi Veliaj.

Godina Nr. 24 ka 88 dhoma dhe numri i studentëve që banojnë aktualisht është 248. Në këtë investim punimet përqendrohen kryesisht në mjediset e përbashkëta, si tualete, ambiente higjiene (dushe), korridore, tarraca dhe fasada e godinës. Konkretisht do të realizohet rikonstruksioni i nyjeve sanitare të përbashkëta në pesë katet, rikonstruksioni i ambienteve ekzistuese hidrosanitare, ndërrimi i sistemit të instalimeve elektrike, shtimi i dy ambienteve të reja të higjienës me hidrosanitare, me 8 kabina të reja, ndriçimi i plotë i ambienteve të përbashkëta, ndriçues cilësore LED. Gjithashtu, do të bëhet rikonstruksioni i plotë i fasadës dhe i tarracës.

G.M./r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

Në hetim në Gjermani për trafik kokaine nga Amerika Latine, SPAK sekuestron pasuritë e Princ Dobroshit dhe Olsi Syziut në Shqipëri

Në hetim në Gjermani për trafik kokaine nga Amerika Latine, SPAK sekuestron pasuritë e Princ Dobroshit dhe Olsi Syziut në Shqipëri