'Rrëmbeni bombat, Vorio-Epiri është Greqi!' Në hetim nëna e Kacifas pas thirrjeve anti-shqiptare (VIDEO)

TIRANE - Nisin hetimet për nënën e Konstandinos Kacifas pas thirrjeve anti-shqiptare që ajo bëri parra varrit të të birit, në 1-vjetorin e vdekjes. Gazetari i Report Tv, Artan Hoxha, raporton se menjëherë pas ceremonisë së zhvilluar në varrezat e fshatit Bularat në përkujtim të Konstantinos Kacifas, më 26 tetor, sektori i Luftëss kundër terrorizmit në Policinë e Shtetit i referoi materialet në Prokurorinë e Gjirokastrës, për  Vasilia Mihal Kacifa.

Vasilia Kacifa është nëna e personit që u vra pas një shkëmbimi zjarri prej 4 orësh për forcat speciale RENEA më 28 tetor 2018.

Nëna 67-vjeçare e Kacifas, banuese në fshatin Bularat, me arsim 12 klasë, me kombësi Greke, shtetësi Greke dhe Shqiptare, gjatë ceremonisë përkujtimore të 1 vjetorit të vdekjes së djalit, Kostandinos Kacifas, ka bërë thirrje që nxisin urrejtje ose grindje midis kombësive dhe fesë. Ajo akuzohet se ka kryer veprën penale te parashikuar nga Neni 265 i Kodit Penal. 

Prokuroria e Gjirokastrës ka filluar procedimin penal edhe për personin nga Dervicani, Aristidh Diamanti, ish-drejtues i degës lokale te OMONIA-s, pasi pengoi, kërcënoi dhe bëri thirrje antishqiptare ndaj gazetareve të mediave shqiptare më datë 26 tetor në hyrje të varrezave civile të fshatit Bularat.

Ish-drejtues i deges se OMONIA-s qe diten e ceremonise perkujtimore nuk deshiroi te identifikohej per gazetaret por vetem kerkoi largimin e tyre

 “Na thoni pse keni vrarë djalin. Përse më vini këtu, ikni qërohuni" bërteti ish-drejtuesi i OMONIA-s ndaj gazetarëve shqiptarë, tashmë i vënë në hetim.

Sikur të mos mjaftohej me kaq, me datë 28 tetor 2019, gjatë ceremonisë zyrtare në përkujtim të festës kombëtare të Greqisë, Vasilia Kacifa, sëbashku me vajzën e saj të ardhur nga Greqia dhe disa persona të tjerë kanë tentuar të shkaktojnë incidente në varrezën e ushtarëve grekë të rënë gjatë Luftës së Dytë Botërore, e cila ndodhet në hyrje te fshatit Bularat. Ata kanë tentuar të hyjnë gjatë aktivitetit zyrtar ku kishte përfaqësues të qeverisë greke dhe shqiptare, për të shfaqur banderola me imazhin e Konstantinos Kacifas dhe për të bërë thirrje luftënxitëse antishqiptare.

Për këtë shkak agjent civilë të shërbimit të Luftës Kundër Terrorit, kanë ndërhyrë duke penguar e moslejuar praninë e tyre në këtë ceremoni dhe duke u sekuestruar parullat me thirrje antishqiptare.

Më poshtë janë pamje kur agjent civilë të policisë shqiptare sekuestrojnë dhe u marrin nga duart parullat me thirrje antishqiptare dhe me imazhin e Konstantinos Kacifas, në hyrje te fshatit Bularat, Vasilia Kacifas dhe personave të tjerë të ardhur nga Greqia që e shoqëronin.

Çfarë deklaroi nëna e Kacifas?

Vasilia Kacifa duke folur në greqisht, në prani të shumë njerëzve, një numër i madh i ardhur nga Greqia pikërisht për 1-vjetorin e vdekjes së djalit, ajo ka bërë thirrje për vrasje, dhunë e luftë.

Ajo tha se vorio-epiri është Greqi, dhe se rinia duhet të ngrihen të armatosur kundër një shteti që ajo e quan diktaturë.

"Djali im, trimi im, jemi grek, autoktonë, në këtë tokë jemi grek autoktonë, jemi ortodoksë, asnjëri nuk mund të prekë krishterimin tonë dhe kombin tonë. Jemi grekë. Tradhtarët. Përse i ndaluan njerëzit të vijnë në Kakavijë? Se janë tradhtarë. Çojuni trima, rrëmbeni tokën, jemi grekë autoktonë. Vorio-epiri është tokë greke, nuk na ndalon asgjë. Ju të gjithë të rinjtë, çohuni rrëmbeni shpatat dhe armët, mos kini frikë asgjë, se këta po na frikësojnë, këtu ka diktaturë nuk ka shtet, rrëmbeni bombat, rrëmbeni pushkët. Rroftë bashkimi.  Jam krenare për ty biri im", thotë ajo.

Çfarë parashikon Neni 265

"Nxitja e urrejtjes ose grindjeve (Ndryshuar neni me ligjin 144/2013, datë 2.5.2013, neni 41)

Nxitja e urrejtjes dhe e grindjeve, për shkak të racës, etnisë, fesë ose orientimit seksual, si dhe përgatitja, përhapja ose ruajtja, me qëllim përhapjen e shkrimeve me përmbajtje të tilla, e kryer me çdo mjet ose formë, dënohet me burgim nga dy deri në dhjetë vjet"

G.M./r.k./Shqiptarja.com

TAG:
• Artan Hoxha
• Kostandinos Kaçifas
• Kostandin Kacifas