Një grup pedagogësh i bashkohen edhe sot protestës, refuzojnë kërkesën e Ramës për dialog! Në krye ish-zyrtari i SHIK-ut të Berishës: Bojkot mësimit! Nuk mungon as dhëndrri dhe vajza e Berishës (VIDEO)

Pasi firmosën një peticion përmes të cilit kërkojnë dorëheqjen e kryeministrit Edi Rama, një grup pedagogësh të mbledhur nga ish këshilltari i Berishës Ermal Hasimja, i janë bashkuar protestës në Tiranë për të dalë në krah të protestuesve. Mes tyre janë edhe dhëndri i Sali Berishës, Jamarbër Malltezi, dhe vajza e ish-kryeministrit, Argita Berisha, si edhe shumë figura të tjera të atashuara me Partinë Demokratike.

Pedagogët u mblodhën fillimisht para Universitetit Politeknik të Tiranës, për të marshuar më pas drejt Kryeministrisë, me thirrjet “Dorëheqje”, “Polici e Shtetit, jo e pushtetit” dhe “Hiqni kapelet”. Me të mbërritur para godinës së qeverisë, ata përmbysën 12 karriget që Rama kishte vendosur pak më herët në formë rrethore, si një ftesë simbolike për dialog, ndërsa grisën edhe pankartat me mbishkrimin “DIALOG”.

“Mora vesh që kryeministri ka vendosur disa karrige para Kryeministrisë dhe thotë se na pret për dialog. Kryeministër, pedagogët s’kanë dialog me ju. Me ju kanë dialog studentët. Zgjidhini problemet me studentët. Ne jemi me studentët, nuk ka komunikim me pedagogët”, tha Aleksandër Kovaçi, kreu i Sindikatës së Punonjësve të Arsimit të Lartë.

LEXO EDHE:
Spahiu: Kriza në Shqipëri zgjidhet vetëm me ndërmjetësimin e SHBA si garant! Shqiptarët nuk bëjnë marrëveshje

Rreth 1300 pedagogë, nga afro 10 mijë që numëron personeli akademik në vend, kanë nënshkruar peticionin, përmes të cilit kërkohet largimi i Ramës nga detyra dhe krijimi i një qeverie kujdestare. Edhe mikrofoni për të parashtruar qëndrimin e pedagogëve, iu la po ashtu një tjetër figure të lidhur më parë me Berishën. Aleksandër Kovaçi, kreu i Sindikatës së Punonjësve të Arsimit të Lartë, ka një të kaluar dhe në shërbimet sekrete në kohën e Berishës kryeministër dhe vetëm një vit më parë kandidoi për drejtimin e degës së PD në Lezhë.

Ai akuzoi qeverinë se nuk u është përgjigjur kërkesave të sindikatës dhe studentëve, duke thënë se një qeveri që nuk u përgjigjet protestuesve paqësorë duhet të presë revolta.

“Qeveria, me gjithë kërkesat që kemi bërë edhe ne si sindikatë që në mars të këtij viti, nuk ka denjuar të përgjigjet zyrtarisht. Kjo është një qeveri që nuk dëgjon. Meqë nuk dëgjoi as studentët, as lëvizjen që më 31 maj, kur nuk u përgjigjet protestuesve paqësorë, duhet të presësh protesta të revoltuara.

Fatkeqësisht, qeveria dhe kryeministri, në vend që t'u përgjigjen protestuesve paqësorë, sot u janë përgjigjur me dhunë, nëpërmjet organeve ligjzbatuese. Ne kemi parë edhe sjellje që rrezikojnë jetën e qytetarëve.

Ne kemi vendosur që në mënyrë simbolike të bëjmë marsh kundër dhunës së policisë dhe të shprehim solidaritetin tonë me studentët. Dhe, siç është theksuar edhe gjatë lëvizjes katërmujore, e cila nuk është dëgjuar nga pala tjetër, sot jemi në situatën kur duhet një zgjidhje. Kjo zgjidhje duhet të vijë nga politika. Nëse politika nuk është e zonja, t'u hapë rrugë pesë kërkesave që kemi paraqitur dhe zgjidhjes politike”, tha ai. 

Kovaçi njoftoi se pedagogët do të vijojnë të mblidhen çdo ditë në orën 10:00 para Universitetit Politeknik, në shenjë solidariteti me studentët.

“Me grupin e sindikatës kemi diskutuar se cili është qëndrimi ynë në vijim. Mbështesim studentët. Qëndrimi i dytë është se bëjmë mirë të mblidhemi çdo ditë në orën 10:00, që të shprehim solidaritetin tonë me studentët. Kjo do të ndodhë derisa të jetë e nevojshme. Çdo ditë, në orën 10:00, do të jemi para Universitetit Politeknik të Tiranës”, tha Kovaçi.

Në fillim të protestës, para godinës doli Drejtoresha e Agjencisë për Media dhe Informim, Manjola Hasa, e cila përsëriti ftesën e ekzekutivit për diskutim.

“Unë jam këtu nisur nga ftesa e hapur për dialog, për këdo që është i interesuar të dialogojë me kryeministrin. Qytetarët që duan të bëjnë këtë dialog me kryeministrin janë të mirëpritur, i kanë dyert e hapura”, tha Hasa.

Kësaj proteste iu bashkua më vonë edhe një grup studentësh. Ata iu përgjigjen me të njëjtën mënyrë karrigeve me mesazhin dialog që kishte vendosur kryeministri Edi Rama para godinës së qeverisë.

Pedagogë të ndryshëm akuzuan Policinë e Shtetit për përdorim të tepruar të forcës, gazit lotsjellës dhe plumbave të gomës gjatë protestave

“Me 100 euro duhet të jetojë një student. Ai del dhe thotë: ‘Do t’u heq edhe bursat’. Me çfarë të drejte? Kush është ai?” tha një pedagoge nga Universiteti i Tiranës për Report Tv.

“Nuk e di me çfarë baze ligjore thotë se kush ka marrë pjesë në protestë do të dënohet. Ky është represion, kjo është tentativë e dështuar e shtypjes së problemeve. Nuk ka diskutim me dhunuesit”, tha një tjetër pedagog.

Pedagogët ishin ende në sheshin para kryeministrisë, kur krerët e Sindikatës, të mbledhur po aty njoftuan vendimin për bojkotin e orëve të mësimit. Nuk është e qartë se sa pedagogë përfaqëson sindikata. Dita e mërkurë do të japë një panoramë të qartë se kush i është përgjigjur thirrjes për bojkot.

Në protestë u panë edhe figura të tjera të atashura pranë PD-së, si ish-anëtarja e Kryesisë së PD, Taulanta Jupi, ish-kandidatja për deputete Ilirjana Kuçana apo Ardian Isufi, ish-anëtar i Këshillit Kombëtar të PD. Ndërsa peticioni është firmosur edhe nga deputetja e PD, Ina Zhupa apo ish-deputetja Sorina Koti.

5 kërkesat e pedagogëve

1. I bëjmë thirrje kryeministrit Rama që të dëgjojë kërkesat e studentëve dhe t’i hapë rrugë paqëtimit të vendit. Kërkojmë dorëheqjen e tij dhe krijimin e një qeverie kujdestare, e cila të sigurojë stabilitetin institucional, qetësimin e situatës dhe respektimin e vullnetit të qytetarëve.

2.⁠ ⁠I bëjmë thirrje policisë dhe aktorëve të tjerë të ruajtjes së rendit që të ndalojnë menjëherë çdo akt dhune ndaj studentëve dhe të refuzojë të zbatojë urdhëra të paligjshëm. Mos harroni se ata që ju japin këto urdhra sot, nesër do t’i mohojnë, ndërsa përgjegjësia do të mbetet mbi ju që jeni dokumentuar nga filmimet e qytetarëve dhe mediave.

3.⁠ ⁠I bëjmë thirrje përfaqësive diplomatike në Tiranë që të ndërhyjnë publikisht për respektimin e të drejtave të qytetarëve, njësoj siç respektohen të drejtat e qytetarëve në vendet tuaja.

4.⁠ ⁠I bëjmë thirrje protestuesve që të mbrojnë bizneset dhe pronën publike e private për t’i hequr çdo justifikim qeverisë për ushtrimin e dhunës dhe delegjitimimin e protestës.

5.⁠ ⁠I bëjmë thirrje qytetarëve të Tiranës, që njësoj si në 1991 t’u bashkohen studentëve për të pamundësuar dhunën ndaj tyre. Asnjë qeveri nuk ka mjaftueshëm policë e gaz lotsjellës për një popull të tërë.

SI.E./E.H/Shqiptarja.com

TAG:
• protestat kunder qeverise
• edi rama
• universitete
• pedagoge
• Jamarbër Malltezi
• argita berisha
• ALEKSANDER KOVACI
• ermal hasimja