Nobeli i Paqes, propozohet Snowden
dhe trioja Thaçi-Ashton-Daçiç

Amerikani Edward Snowden dhe trioja Catherine Ashton, Hashim Thaçi dhe Ivica Daçiç, janë propozuar sot si kandidatë për çmimin Nobel të Paqes nga dy grupime të Parlamentit Evropian,nga grupi i Gjelbërt dhe grupi Socialist i Parlamentit Evropian.

“Grupi i Gjelbër shpreh dëshirën që lajmëtari Edward Snowden të zgjidhet për çmimin Nobel të Paqes, me qëllim që të përshëndesim kontributin e tij në mbrojtjen e të drejtave tona universale, më saktësisht të së drejtës së jetës private dhe të lirisë së fjalës”, kanë shkruar në një letër që i drejtohet komitetit norvegjez të çmimit Nobel dy presidentët e grupit të Gjelbërt, gjermanja Rebecca Harms dhe eurodeputetja franceze Daniel Cohn-Bendit.

“Duke sakrifikuar lirinë e vet, Edward Snowden, ka mundësuar një ndërgjegjësim botëror për pasojat e një sistemi përgjimi në masë dhe të nevojës së të vepruarit të gjithë sëbashku për të siguruar që progreset e teknologjisë së komunikimit të jenë një element në shërbim të paqes dhe jo një kërcënim kudrejt shoqërisë”, janë shprehur eurodeputetët e Gjelbërt në letrën e tyre.

Nga ana tjetër, presidenti i grupit Socialist të Parlamentit Evropian, austriaku Hannes Swoboda, ka shprehur se treshja Catherine Ashton, Hashim Thaçi dhe Ivica Daçiç të marrin çmimin Nobel. Ky çmim, sipas tij, do të kompesojë përpjekjet e tyre dhe duke i nxitur që marrëdhëniet mes Serbisë dhe Kosovës të normalizohen. “Sot, këto marrëdhënie janë ende shumë të brishta, por ato ekzistojnë, madje përpjekjet për t’i normalizuar janë të paprecedenta dhe kanë krijuar mundësinë e një bashkëpunimi dhe të një paqeje të qëndrueshme në rajon, ”, ka deklaruar Swoboda.

(Genti Sinani/ata/shqiptarja.com)