Kolegji i Posaçëm i Apelimit vendosi lënien në fuqi të vendimit të Komisionit të Pavarur të Kualifikimit për shkarkimin nga detyra të gjyqtarit të Korçës Seladin Pysqyli.

Pysqyli rezultonte në pamundësi financiare për krijimin e pasurive, si dhe se bëri përpjekje për të deformuar të vërtetën lidhur me një apartament në Tiranë, me qëllim shmangien e deklarimit të vlerës reale të kësaj banese.

“Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Rezarta Schuetz relatore, Albana Shtylla, Mimoza Tasi, Sokol Çomo anëtarë, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi lënien në fuqi të vendimit nr. 788, datë 25.07.2024 të Komisionit të Pavarur të Kualifikimit, që i përket subjektit të rivlerësimit Seladin Pysqyli”, thuhet në njoftimin e KPA-së.

Njoftim vendimi:

Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Rezarta Schuetz relatore, Albana Shtylla, Mimoza Tasi, Sokol Çomo anëtarë, shpalli vendimin për çështjen nr. 45/2024, datë 11.11.2024, që i përket ankimit të subjektit të rivlerësimit Seladin Pysqyli kundër vendimit të Komisionit të Pavarur të Kualifikimit nr. 788, datë 25.07.2024.

Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:

Lënien në fuqi të vendimit nr. 788, datë 25.07.2024 të Komisionit të Pavarur të Kualifikimit, që i përket subjektit të rivlerësimit Seladin Pysqyli.

Ky vendim është përfundimtar dhe ka efekt të menjëhershëm.

U shpall në Tiranë, më datë 11.02.2026.