Një godinë katërkatëshe biznesi, e ndodhur në anë të superstradës Lezhë–Milot, ishte përshtatur për kultivimin e bimëve narkotike. Ky aktivitet kriminal u zbulua nga policia, e cila gjatë natës zhvilloi operacionin e koduar “Second Floor”, ku u arrestuan babë e bir, si dhe një punonjës i OSHEE-së, ndërsa katër persona të tjerë po hetohen në gjendje të lirë për veprën penale “Shpërdorim detyre”.

Sipas policisë, në katin e dytë të këtij objekti ishin përshtatur katër ambiente për kultivimin e bimëve narkotike, të pajisura me llamba ndriçimi. Gjatë ndërhyrjes, shërbimet e Policisë kapën në flagrancë dhe arrestuan shtetasit Arben Gjergji, 57 vjeç, dhe Arnold Gjergji, 22 vjeç (babë e bir), si autorë të kësaj veprimtarie kriminale.

Në vijim të veprimeve hetimore për këtë rast, u arrestua shtetasi Gjon Doda, 59 vjeç, punonjës i OSHEE-së, i dyshuar për shpërdorim detyre dhe si bashkëpunëtor në kultivimin e bimëve narkotike. Gjithashtu, materialet procedurale iu referuan Prokurorisë, ku nisi procedimi penal në gjendje të lirë për katër punonjës të OSHEE-së, shtetasit M. P., A. Gj., E. R. dhe O. T., të dyshuar për shpërdorim detyre.

Nga kontrolli i ushtruar në katin e dytë të objektit, u gjetën dhe u sekuestruan në cilësinë e provës materiale: 8.8 kg lëndë e dyshuar narkotike kanabis (e tharë), 1064 bimë kanabis, 960 fidanë kanabisi të mbjellë në kubikë, 850 fara kanabisi, 106 llamba me transformator që shërbenin për kultivimin e bimëve narkotike, një armë zjarri automatike me dy krehra me fishekë, një pistoletë sportive me fishekë, një automjet dhe katër aparate celularë.

Po ashtu, nga kontrolli i kryer në banesat e shtetasve të arrestuar, u gjetën dhe u sekuestruan 180 gramë lëndë e dyshuar narkotike kokainë, një pistoletë me mulli, një armë zjarri pushkë dhe një armë sportive.

Nga veprimet hetimore të kryera rezulton se objekti ishte marrë me qira nga babë e bir që prej muajit qershor të vitit 2025 dhe ishte përshtatur për kultivimin e bimëve narkotike, ndërsa vijon puna për identifikimin e personave të tjerë të përfshirë në këtë veprimtari kriminale.

Rendit zhvillimet sipas orarit:
Ora 10:15
Kanabis në 4 ambiente, pamjet nga operacioni antidrogë në Rrilë! Arrestohen babë e bir dhe një punonjës i OSHEE, sekuestrohen 8.8 kg kanabis

 

Këto janë pamjet nga operacioni antidrogë në Rrilë të Lezhës tregojnë shtëpinë e barit brenda një qendre trekatëshe biznesi, të përdorur si magazinë.

Policia ka vënë në pranga babë e bir, me iniciale A. Gj., 57 vjeç dhe A. GJ., 22 vjeç të kapur në flagrancë.

Është arrestuar edhe një punonjës i OSHEE-së, me iniciale Gj.D., 59 vjeç. Gjithashtu janë vendosur nën hetim 4 të tjerë për shpërdorim detyre, me iniciale M. P., A. Gj., E. R dhe O. T.

Në katin e dytë të ndërtesës ishin përshtatur 4 ambiente për kultivimin, tharjen dhe përpunimin e bimëve narkotike. Nga verifikimet rezultoi se në këtë objekt kishte lidhje të paligjshme të energjisë elektrike.

Policia sekuestroi 8.8 kilogramë kanabis të tharë, 1064 bimë, 960 fidanë dhe 850 fara kanabisi, 106 llamba elektrike dhe 180 gramë kokainë. Gjithashtu u sekuestruan 1 automatik me dy krehra me fishekë, 1 pistoletë sportive me fishekë, 1 automjet dhe 4 celularë. 

Nga hetimet dyshohet se kjo veprimtari kriminale kryhej prej disa muajsh. Policia po punon për zbardhjen e plotë të rastit dhe identifikimin e personave të përfshirë.

Materialet hetimore do t’i referohen prokurorisë së Lezhës.

P.J/Shqiptarja.com