MIRDITË – 40 kg kanabis janë gjetur pranë një banese Mirditë, e cila ishte në process tharjeje. Në pranga u vunë tre persona, dy prej tyre vëllezër, të cilët akuzohen për kultivim dhe prodhim të lëndëve narkotike. U arrestuan Akil Reçi, 33-vjeç, dhe vëllezërit Martin dhe Erjon Zefi, 34 dhe 38-vjeç.

Droga u gjet afër një banese në fshatin Shëngjergj, ndërsa u sekuestruan edhe 4 automjete dhe 5 celularë, që dyshohet se përdoreshin nga autorët. Arrestimet dhe sekuestrimi i drogës vijnë në vijim të operacionit të koduar “Processing”, në kuadër të të cilit ka pasur arrestime edhe më parë.

Më 8 tetor, policia vuri në pranga në kuadër të “Processing” Preng Markun dhe Kristian Pimën, të dy 31-vjeç, ndërsa sekuestroi rreth 33.7 kg kanabis, e cila u gjet në një ambient të përshtatur për tharjen dhe përgatitjen e bimëve narkotike. U asgjesuan gjithashtu 220 bimë kanabisi të kultivuara në dy parcela.

Njoftimi i policisë:

Mirditë/Vijon operacioni policor i koduar “Processing”, për goditjen e veprimtarive kriminale në fushën e narkotikëve.

Nga hetimet janë identifikuar 3 shtetas, të dyshuar si bashkëpunëtorë me 2 shtetasit e arrestuar gjatë fazës së parë të operacionit, që u zhvillua 1 javë më parë.

Arrestohen 3 shtetasit (2 prej tyre vëllezër).

Sekuestrohen 40 kilogramë lëndë e dyshuar narkotike cannabis sativa, në proces tharjeje, 4 automjete dhe 5 celulare.

Si rezultat i hetimeve të kryera në kuadër të operacionit policor të koduar “Processing”, specialistët e Seksionit për Hetimin e Narkotikëve, në bashkëpunim me Seksionin e Mbështetjes Operacionale për Hetimin, të DVP Lezhë, kanë finalizuar fazën e dytë të këtij operacioni, për goditjen e veprimtarive kriminale në fushën e narkotikëve.

Nga hetimet janë identifikuar shtetasit M. Z. dhe E. Z. (vëllezër) dhe A. R., të cilët dyshohet se kanë kultivuar bimë narkotike dhe kanë prodhuar lëndë narkotike, me qëllim shitjen, në bashkëpunim me shtetasit P. M. dhe K. P., të arrestuar 1 javë më parë, në kuadër të fazës së parë të operacionit të koduar “Processing”, gjatë së cilës u sekuestruan rreth 33.7 kilogramë lëndë narkotike cannabis sativa, si dhe u asgjësuan 220 bimë narkotike të kultivuara në fshatin Shtuf, Mirditë.

Gjatë fazës së dytë, shërbimet e Policisë kanë gjetur afër një banese të vjetër në fshatin Shëngjergj, Mirditë, dhe kanë sekuestruar rreth 40 kilogramë lëndë të dyshuar narkotike cannabis sativa, në proces tharjeje, 4 automjete dhe 5 celulare që dyshohet se përdoreshin nga autorët për veprimtarinë kriminale.

Në përfundim të veprimeve hetimore u arrestuan në flagrancë shtetasit: A. R., 33 vjeç, banues në Mirditë; M. Z., 34 vjeç, banues në Mirditë; dhe E. Z., 38 vjeç, banues në Mirditë. Operacioni policor i koduar “Processing” vijon, me qëllim identifikimin dhe kapjen e shtetasve të tjerë që mund të jenë të përfshirë në këtë veprimtari kriminale.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme, për veprat penale “Kultivimi i bimëve narkotike” dhe “Prodhimi dhe shitja e narkotikëve”, të kryera në bashkëpunim.