Bojkotoi zgjedhjet, por opozita i kërkon KQZ-së materialet e 30 Qershorit dhe pamjet: Do nxjerrim manipulimet

Partitë e koalicionit opozitar i kërkojnë Komisionit Qendror të Zgjedhjeve t’u vërë në dispozicion materialet zgjedhore të 30 Qershorit. Opozita shprehet se synimi i saj është që përmes këtyre materialeve, të dëshmojë sipas saj manipulimet e kryera më 30 Qershor, ku akuzon PS-në se mbushi kutitë duke rritur fiktivisht numrin e pjesëmarrjes. 

Partia Demokratike thekson se partitë e opozitës kanë kërkuar vënien në dispozicion të materialeve zgjedhore duke iu referuar Kodit të Procedurës Administrative dhe Ligjit për të Drejtën e Informimit. Por kujtojmë se PD-LSI dhe aleatët e opozitës bojkotuan procesin e 30 Qershorit, ndërsa kërkesa për të pasur anëtarë në KZAZ-të u rrëzua nga KQZ-ja dhe Kolegji Zgjedhor.

Selia blu thotë se materialet zgjedhore nuk klasifikohen si sekret dhe, sipas ligjit, ato duhet të vihen në dispozicion brenda 10 ditësh. Në letër thuhet se kërkesa për vënien në dispozicion të materialeve zgjedhore bëhet “në kushtet, kur opozitës iu mohua përfaqësimi me anëtarë në të gjitha nivelet e administratës zgjedhore në votimet moniste të 30 Qershorit". Kërkesa është firmosur nga Sekretari i Përgjithshëm i PD, Gazment Bardhi, në emër të partive të koalicionit opozitar, përfshin 8 elementë:

1. Kopje të printuara të listave zgjedhore për çdo qendër votimi.

2. Kopje e vërtetuar e Tabelës Përmbledhëse të rezultatit për zonën zgjedhore nga KQZ-ja.

3. Kopje të vërtetuara të Tabelave Përmbledhëse të rezultateve zgjedhore për çdo njësi të qeverisjes vendore nga KZAZ-ja.

4. Kopje të vërtetuara të tabelave të rezultateve për çdo qendër votimi nga grupet e numërimit.

5. Kopje të vërtetuara të procesverbaleve tip për mbylljen e votimit për qendër votimi.

6. Kopje të vërtetuara të listës së anëtarëve të administratës zgjedhore, të emëruar kryesisht nga KQZ dhe KZAZ përkatëse, duke specifikuar për secilin administratën zgjedhore në të cilën ai bën pjesë, sipas regjistrit të administrimit zgjedhor që mban KQZ-ja, për çdo qendër votimi, KZAZ dhe Grup Numërimi.

7. Kopje të regjistrimit të kamerave të të gjitha tavolinave të numërimit në çdo Grup të Numërimit të Votave.

8. Kopje të regjistrimit të kamerave të ambienteve të brendshme të KZAZ-ve.

I kontaktuar nga Shqiptarja.com, ish-kreu i KQZ-së Kristaq Kume u shpreh se bazuar te ligji për të drejtën e informimit, KQZ-ja duhet ti vendosë në dispozicion materialet zgjedhore opozitës, pavarësisht se nuk mori pjesë në zgjedhje. 

 Kërkesa e PD

/r.k./Shqiptarja.com

TAG:
• zgjedhjet lokale 2019
• gazment bardhi