Natën mes së shtunës, 24 tetor, dhe së dielës, 25 tetor, akrepat e orës do të zhvendosen një orë prapa dhe rikthehet ora dimërore.

Ndonëse efektet e ndryshimit të orës në shëndet nuk janë të forta, ato ekzistojnë pikërisht për shkak të mospërputhjes mes orës sonë të brendshme biologjike dhe ritmeve të jashtme.

Ritmi cirkadian (i cili sinkronizon gjumin, hormonet, temperaturën e trupit dhe metabolizmin me alternimin e dritës dhe errësirës) ndikon në ciklin gjumë-zgjim, por edhe në sistemin endokrin dhe atë kardiovaskular. Pasojat prekin të gjitha organet.

Ndikimi në gjumë dhe në sistemin kardiovaskular vërehet më shumë në pranverë, me kalimin në orën verore dhe mungesën e gjumit (e cila shpjegon rritjen e numrit të aksidenteve). Gjumi pengon sekretimin e kortizolit, hormonit të stresit, i cili ka ndikim negativ në sistemin kardiovaskular.

Një studim ka treguar se, në ditët pas kalimit në orën verore, rritet numri i shtrimeve në spital, për shembull, për shkak të infarktit të miokardit. Çrregullimi i ritmeve biologjike ka padyshim edhe efekte negative në humor dhe në aftësitë njohëse, natyrisht në një periudhë afatshkurtër.

Kur ndodhin ndryshime në ritmin gjumë-zgjim, personat që preken më shumë janë kryesisht të moshuarit dhe fëmijët, sepse janë mësuar të kenë orare të caktuara që përcaktojnë rrjedhën e ditës, siç janë oraret e vakteve dhe të pushimit.

Duke pasur parasysh se studimet kanë treguar se me ndryshimin e orës në vjeshtë priremi të flemë rreth 30–40 minuta më shumë (gjë që përgjithësisht është pozitive), ata që mund të vuajnë më shumë janë personat që zgjohen herët. Ndërsa, të paktën në ditët e para, më të kënaqur do të jenë ata që preferojnë të flenë në mëngjes dhe të shkojnë në shtrat pak më vonë në mbrëmje.

Megjithatë, bëhet fjalë për një ndryshim, efektet e të cilit zgjasin vetëm disa ditë. Organizmi ynë arrin të përshtatet me të.

Për të qenë të përgatitur, gjatë 3–4 ditëve përpara hyrjes në fuqi të orës së re, është mirë të përpiqemi t’i përshtatim gradualisht aktivitetet tona dhe oraret e vakteve me të.