Rruga që lidh fshatin Orosh me rrugën e kombit, prej vitesh ndodhet në gjendje të mjerueshme. Banorët shprehen se nga Bashkia e rrethit Mirditë, nuk është marrë asnjë masë për rikonstruktimin e saj, pavarësisht kërkesave të bëra.
Oroshi, dikur kryeqendra e Mirditës, me një histori të vjetër sa vetë jeta, sot gjendet i braktisur. Rruga që lidh Oroshin me zonat përreth është në një gjendje aspak normale, madje nuk të jep përshtypjen e një rruge, pasi në të gjithë gjatësinë e saj ka gropa të thella të shkaktuara nga gërryerjet e ujit.
Banorët e Oroshit kërkojnë rikonstruktimin e kësaj rruge lidhëse me atë të Kombit, e cila është vetëm 4 kilometra e gjatë, por nga amortizimi i tejskajshëm, duhet 1 orë për ta përshkuar.
Ne kemi shumë probleme, jemi shumë mangët me të gjitha. Kryesorja për ne, është qarkullimi rrugor.
Preng Tuci, banor i Oroshit
Problemet më të mëdha të kësaj zone dhe të një fshati, siç është Oroshi, fshat me histori në Mirditë dhe njihet në botë e në tërë Shqipërinë. Thanë që mbas 90-ës që do ta bëjmë, do ta rregullojmë, por asnjë qeveri nuk e ka rregulluar. Duhet 1 orë për 4km të shkosh në autostradë.
Arben Prenga, banor i Oroshit
Nga Bashkia e rrethit të Mirditës nuk është marrë asnjë masë për rregullimin e rrugës, pavarësisht vështirësive që ajo sjell, sidomos në raste urgjencash mjekësore.
