Përmbyset në Lezhë e
djathta fiton e majta

TIRANE - E majta fiton në qarkun e Lezhës duke siguruar përfundimisht katër mandate deputeti. Qarku i Lezhës çon në Parlament gjithsej 7 mandate për deputet. Ndryshe nga zgjedhjet e vitit 2009, ku rezultatet kanë qenë në favor të koalicionit të djathtë, i cili ka patur 4 mandate kundrejt 3 mandateve të koalicionit të majtë, në zgjedhjet që sapo kanë përfundur ky qark ashtu si shumë qarqe të tjera ka sjellë një përmbysje të rezultatit të ndarjes së mandateve.

Koalicioni i majtë, pra Aleanca për Shqipërinë Europiane ka marrë 4 mandate dhe koalicioni i djathtë Aleanca për Punësim, Mirëqënie dhe Integrim ka marrë vetëm 3 mandate. Surpriza në këtë qark është pikërisht partia Lëvizja Socialiste për Integrim, e cila ka arritur që të marrë një mandat, kjo duke iu referuar të dhënave të nxjerra në bazë të llogaritjeve të numrit të votave dhe interpretimit të tyre në mandate.

E para që udhëheq LSI në këtë qark, i cili tashmë ka pësuar ndryshime rrënjësore në ndarjen e mandateve, është pikërisht bashkëshortja e kreut të kësaj partie, Monika Kryemadhi.

Ajo që vihet re është pikërisht në këtë qark për partinë që merr për herë të parë mandate këtu është se LSI ka arritur që të fitojë deri në zona të thella të këtij qarku. Ndëekohë që në koaliconin e majtë deputeti që mban sërish mandatin është Armando Prenga, ku me të cilin kanë fituar edhe kryesuesja e listës së PS, Mimi Kodheli dhe i treti në listën e PS, Arben Ndoka.

Ndërkohë që koalicioni i djathtë ka arritur të sigurojë 3 mandate, ku konkretisht kanë fituar mandatin Aldo Bumçi,Gjovalin Kadeli dhe Albina Deda. Kadeli, ish-deputeti i Partisë Socialiste arriti që të siguronte një vend të sigurt në listën e PD, çfarë ka bërë që të jetë sërish deputet në Parlamentin e ri të 2013. Në këtë qark, i cili përfshin 258 qendra votimi ku votojnë 159.207 votues. Edhe Fryma e Re Demokratike dhe Aleanca Kuq e Zi kanë marrë një numër të vogël votash.

QARKU LEZHË (7 MANDATE)

PS 3 MANDATE

1.Mimi Kodheli
2.Armando Prenga
3.Arben Ndoka

LSI: 1 MANDAT

1.Monika Kryemadhi

PD 3 MANDATE

1.Aldo Bumçi
2.Gjovalin Kadeli
3.Albina Deda

Shkrimi u botua sot në gazetën Shqiptarja.com (print) 26.06.2013
 
Redaksia Online
(b.m/shqiptarja.com)