Paketa e Maleve/ Rama zbulon detaje: I jep zgjidhje problemit që ka lindur me ligjin 7501! Pasi përfundon investimin, mund të marrësh titull pronësie! Ja procedura

Kryeministri Edi Rama gjatë takimit me përfaqësues të agroturizmit në Tiranë, teksa hodhi akuza ndaj opozitës për ‘eksportim të baltës dhe helmit’ nga kryeqyteti shqiptar drejt vendeve të BE-së, me qëllim sipas tij goditjen e qeverisë, shtoi se të njëjtën gjë PD bëri edhe edhe me ligjin për portet turistike në Parlament (duke alarmuar edhe BE-në).

Gjatë fjalës së tij, Rama tha se ndryshimi ishte i domosdoshëm për të mos penguar dhe për të mos vonuar investitorët të cilët investojnë në bregdet në pronat e tyre, dhe kanë një projekt që ka dhe një pontil apo një marinë të vogël.

Sipas kryeministrit, Shqipëria është një vend që ka një defiçencë shumë të madhe me pikat e ankorimit në det (për porte të vogla për anije turistike, jo për porte të mëdha).

Pjesë nga fjala e Ramës:

E para, më vjen mirë nëse e kam shpjeguar si duhet Paketën e Maleve sepse do duhet ta shpjegojmë shumë shpesh, sepse ka shumë “helm” që hidhet çdo ditë këtu, siç besoj mund ta keni parë, mund mos ta keni parë, rezistencën idiote që u bë për një ndryshim krejt të thjeshtë për portet në parlament, aq sa u vu alarmi edhe në Bashkimin Europian. U çua nga këtu atje, se në këtë pikë domethënë jemi i pari dhe unë jam i bindur, i fundit vend kandidat në historinë e zgjerimit të Bashkimit Europian, që “eksportojmë baltë dhe helm” nga kryeqyteti ynë drejt kryeqyteteve të tjera dhe u tha që “qeveria po ndryshon ligjin se do t'i japë oligarkëve portet pa garë’’.

Në fakt, ndryshimi është i domosdoshëm për të mos penguar dhe për të mos vonuar dhe marrë zvarrë, investitorët të cilët investojnë në bregdet në pronat e tyre, dhe vijnë me një projekt që ka dhe një pontil apo një marinë të vogël dhe përgjigjja që marrin është: “mund ta marrësh lejen për këtë pjesën tjetër, për pontilin dhe për marinën duhet bërë tender”. Sepse në ligjin ekzistues, normal, duke qenë se deti është nën administrimin total të shtetit, për portet turistike që ndërton, që nxjerr në garë qeveria, bëhet garë, ndërsa t'i thuash tjetrit që “ti investoje gjithë këtë këtu, po për parkimin, se porti është një parkim i anijeve, për parkimin do bëjmë një garë’’, i bie që të krijosh “territore luftrash” midis le njëherë që ai që bën investimin do të thotë “po heq fare pontilin’’.

Ne jemi një vend që kemi një defiçencë shumë të madhe me pikat e ankorimit në det, shumë të madhe. Qindra e qindra porte kanë të tjerët, ankorimi,  dhe këtu s'flitet për porte si Marina e Durrësit apo si Marina e Vlorës që janë marina të mëdha turistike. Këtu dhe për porte të vogla dhe vëmë në diskutim këtë gjë. Pra, flitet për çdo gjë në mënyrë të mbrapshtë sepse nuk kanë dhe faj, nuk kanë dhe faj, u bënë kaq shumë vite që s'kanë lidhje fare me punët e shtetit.

Kryeministri Edi Rama, gjatë takimit me përfaqësues të agroturizmit në Tiranë, bëri të ditur se qeveria po krijon Bankën Shqiptare të Zhvillimit.

Kjo iniciativë sipas kryeministrit vjen pasi sektori i bujqësisë vazhdon të përballet me vështirësi në sigurimin e financimit nga bankat, për shkak të perceptimit që konsiderohet si një fushë me risk të lartë.

Ai theksoi se institucioni është në fazë përgatitore, ka siguruar ambientet dhe po ndërton stafin e tij, ndërsa pritet që së shpejti të bëhet plotësisht operative.

Shefi i Ekzekutivit shpjegoi më tej se kjo bankë do të krijojë mundësi të reja për financimin e iniciativave, me fokus te ndërmarrjet e vogla dhe të mesme.

“Bankat kanë një rezervë më të madhe ndaj bujqësisë dhe ndaj sektorëve të tjerë, sepse e konsiderojnë një sektor me risk të lartë. Për të pasur më shumë kontroll, ne po krijojmë dhe Bankën Shqiptare të Zhvillimit, e cila po zhvillon stafin e vet. Ka marrë edhe zyrat dhe së shpejti do të jetë operacionale. Do na japë mundësinë që të mbështesim shumë iniciativa”, tha mes të tjerash kryeministri Rama.

Kryeministri Edi Rama, i shoqëruar edhe nga drejtuesja politike e qarkut, Ogerta Manastirliu, kanë zhvilluar një takim me përfaqësues të agroturizmit në Tiranë, për të folur për ‘Paketën e Maleve’, një program që bashkë me fazat e tjera të këtij procesi ka synim që t’i japë një impuls të ri industrisë së turizmit në vendin tonë.

Gjatë fjalës së saj, Manastirliu është shprehur se ka pasur një interes të shtuar për programet e qeverisë, për mbështetjen e bizneseve.

“Dua të theksoj faktin se bashkëpunimi ynë ka qenë i vazhdueshëm. Mbështetja nga programet, qoftë të qeverisë, qoftë të Bashkisë, janë incentiva për t’u zhvilluar më shumë. Edhe këto takime që ne kemi nisur i vlejnë edhe diskutimeve, sesi ne mund të bashkëpunojmë më shumë sëbashku për ekonominë e Tiranës, për të rritur investimet në këtë zona, për të ulur pengesat burokratike administrative. Do të kemi një veprim të shpejtë nga qeveria, pasi Bashkia e Tiranës të depozitojë hartën ku do të kemi aplikimet e para. Vetëm për Dajtin janë mbi 100 shprehje interesi që kanë ardhur. Në të gjithë Tiranën janë mbi 600. Ka mundësi që ne të zhvillohemi. Ne do të vijojmë me ritëm për të aplikuar këto dy programe kaq të rëndësishme”, tha Manastirliu.

Ndërkohë gjatë fjalës së tij, Rama ka prezantuar programin ‘Dyfisho Ndërmarrjen Tënde’, një program që sipas kryeministrit synon të mbështesë ndërmarrjet e vogla dhe të mesme.

Kryeministri shpjegoi se ky projekt do të mbështetet nga një linjë kredie e Bankës së Shqipërisë, e cila do të përpunohet nga bankat e nivelit të dytë dhe do të ketë garanci sovrane nga qeveria.

“Ky takim synon të ndihmojë jo thjesht ju që jeni këtu, por të gjithë ata që janë të interesuar për t’u informuar me mundësitë e reja, që do të vihen në dispozicion të të gjithë atyre që do të duan të jenë protagonistë në këtë fushë. Dua ta nis te programi i ri kombëtar që ne po përgatisim, që do të lançohet sëshpejti. Në fund të muajit do të kemi marrëveshjen mes Bankës së Shqipërisë, bankave të nivelit të dytë dhe qeverisë për një linjë financimi të mbështetur nga qeveria shqiptare, për të mbështetur çdo projekt për këdo që ka një ndërmarrje të vogël apo të mesme dhe që ka ndërmend ta rrisë atë. E kemi quajtur projektin ‘dyfisho ndërmarrjen tënde’. Ky projekt do të mbështet nga një linjë kredie e Bankës së Shqipërisë, e cila do të përpunohet nga bankat e nivelit të dytë në bazë të aplikimeve dhe do të garantohet nga qeveria shqiptare me një garanci sovrane dhe do të ketë një interes të kredisë më të ulët sesa kreditë komerciale. Plus që do të ketë një limit deri në 2 milionë euro. Nuk do të jetë e mundur të aksesohet nga kompanitë e mëdha, por do të aksesohet nga Start-Up, nga ndërmarrjet e vogla e të mesme, nga punishtet dhe agroturizmat që duan të rriten”, tha mes të tjerash Rama.