Balla shfaqet me kryetarin demokrat të bashkisë Kavajë: Bashkëpunim me autoritetet për garantimin e perimetrit të sigurisë në shkolla

Gjatë fjalës së tij, Balla ritheksoi domosdoshmërinë e krijimit të një koalicioni të gjerë, me shumë aktorë e institucione për të garantuar më shumë siguri për nxënësit e fëmijët.

“Bashkë me Fisnikun, Kryetarin e bashkisë, jemi sot në shkollën me më shumë emër dhe traditë në të gjithë bashkinë e Kavajës për shkak edhe të numrit të lartë të intelektualëve, personaliteteve që kjo shkollë ka nxjerrë, jo vetëm për Kavajën por për gjithë Shqipërinë në fakt.

Arsyeja themelore për të cilën jam këtu është pjesa që lidhet me paketën e  sigurisë në shkolla.
Ju e dini fare mirë se na duhet të bashkëpunojmë më të gjitha autoritetet dhe këtu bashkëpunimi me bashkinë është tepër i rëndësishëm për gjithçka që lidhet me garantimin e  perimetrit të sigurisë.
Nuk kam asnjë dyshim që brenda oborrit të shkollës dhe brenda shkollës nuk ka pasur dhe nuk ka për të pasur problematika. Shqetësimi im është pjesa përtej gardhit, rruga e nxënësve nga shtëpia në shkollë dhe tani që ikin nga shkolla me të mbaruar mësimi dhe që lidhet me një fenomen që nuk ekziston vetëm në Shqipëri por ekziston në të gjithë botën, por që është kthyer sot në një kërcënim për fëmijët e që lidhet me përdorimin e lëndëve narkotike", tha Balla. 

LEXO EDHE:
Balla takim me studentë dhe profesionistë shqiptarë në Selanik: Shqipëria, tërheqëse edhe në aspektin ekonomik

Tutje, Balla tha se është shumë i sigurt që mësuesit jua kanë shpjeguar me dhjetëra herë nxënësve se përdorimi i kanabisit, lëndëve psikotrope, janë të dëmshme, ndërsa theksoi edhe ndalimin e përdorimit të oksidit të azotit.

"Edhe oksidi i azotit, nëse përdoret në sasi të pakontrolluar, dhe ne do ta vendosim në ligj dhe vendimet e qeverisë që ajo të mos përdoret. Pastaj kanabisi është po ashtu i dëmshëm. Jo vetëm që ju heq mendjen nga mësimi, por ju heq mendjen nga të gjitha.
Në këtë këndvështrim na duhet të krijojmë një koalicion. Unë gjej rastin ta falënderoj kryetarin e bashkisë së Kavajës për bashkëpunimin, sepse do na duhet me bashkinë të rrisim kamerat e sigurisë pothuajse në të gjithë territorin e perimetrit të sigurisë pranë kësaj shkolle dhe në të gjitha shkollat e Kavajës", tha Balla.

Ndërsa theksoi nevojën dhe domosdoshmërinë  ebashkpunimit mes Policisë së Shtetit dhe autoriteteve, balla tha se Policia e Shtetit do të bëjë gjithçka për të ngritur nivelin e sigurisë dhe zbatimin e paketës së sigurisë në shkolla edhe në Kavajë,” deklaroi ministri Balla në Kavajë.

"Natyrshëm edhe nga ana jonë nuk do të mungojë mbështetja, komunikimi me drejtorin e policisë vendore, Drejtorin e Përgjithshëm të Policisë dhe me strukturat e tjera të qeverisë për të mbështetur bashkinë e Kavajës në aspektin e përmirësimit të infrastrukturës së sigurisë ku kamerat janë pa dyshim një element shumë i rëndësishëm sigurie.
Unë kam besim që këto djem e vajza të shkëlqyer të Kavajës do të bëhen pjesë e këtij koalicioni kundër përdorimit të lëndëve narkotike dhe natyrshëm ne na takon që besimin dhe besën që na kanë dhënë prindërit e tyre, ndërsa i sjellin në shkollë, ne t’i qëndrojmë fjalës dhe besës së dhënë për të mos lejuar asnjë keqbërës që afrohet pranë shkollës për të shitur lëndët narkotike dhe për të bërë biznes me jetën e fëmijëve tanë. Secili nga ne është prind dhe e di se sa shumë e rëndësishme dhe se sa më të qetë do të jenë prindërit ditën që ne të garantojmë këtë perimetër sigurie.

Do të bëjmë gjithçka më mirë dhe do ta ngremë nivelin e sigurisë dhe zbatimin e paketës së sigurisë në shkolla edhe në Kavajë,” deklaroi ministri Balla në Kavajë.

M.T/Shqiptarja.com

TAG:
• droge afer shkollave
• kavaje
• taulant balla