Pallat tek Fakulteti i Ekonomikut
pedagogë e studentë s'hyjnë në provim

TIRANE - Pedagogët dhe studentët e Fakultetit Ekonomik pranë Universitetit të Tiranës në shënje proteste kundër ndërtimit të një pallati në territorin e këtij institucioni kanë pezulluar të gjitha provimet e ditës së sotme.

Kjo masë ishte paralajmëruar kohë më parë, ndërsa sipas zv Dekanit të këtij fakulteti, Fatmir Mema, ka një vendim gjykate që e detyron kompaninë e ndërtimit të ndalojë punimet, ndërsa i bën apel instancave përgjegjëse të marrin masa për zbatimin e ligjit.

“Ne kërkojmë zbatimin e ligjit. Ka një vendim gjykate për ndërprerjen e punimeve, pasi kjo s’ka leje ndërtimi do të përdorim të gjithë metodat demokratike që lejon ligji për të fituar të drejtat tona”- thotë Mema.
 
Ndërkohë përfaqësuesi i Këshillit Studentor pranë këtij fakulteti, Armil Roko, u shpreh se protestat dhe bojkoti do të vazhdojnë edhe në ditët në vijim, ndërsa theksoi se ky ndërtim pengon zgjerimin e godinës së Fakultetit Ekonomik.
 
“Është vendim gjykate që është marrë për shfuqizim të lejes së ndërtimit që nuk po zbatohet. Ne kërkojmë që të gjendet një zgjidhje”- thotë Roko.
 
Nga ana tjetër pronarët e pallatit që po ndërtohet shprehen se kanë  dokumentacionin e rregullt për vijimine e punimeve, madje theksojnë se për këtë ka dhe një vendim gjykate.
 
“Objekti në fjalë ka një leje ndërtimi të lëshuar nga KKRT e Tiranës, një vendim gjykate dhe një urdhër Përmbarimi për lejimin e vazhdimit të punimeve”

Protestat kundër ndërtimit të këtij pallati kanë filluar kohë më parë, ndërsa çështja prej kohësh iu nënshtrua një kalvari gjygjesh.

Redaksia online
(sg/shqiptarja.com)