Panairi i librit, Luljeta Lleshanaku
Autorja e vitit

Panairi i librit “Tirana 2013” ndau çmimet e edicionit të 16-të në ditën e katërt të tij, ku ishte e pranishme ministrja e Kulturës Mirela Kumbaro, Ambasadorja franceze Christine Moro , botues, shkrimtarë dhe dashamirës të librit.

“Autori i vitit” u vlerësua Luljeta Lleshanaku për librin me poezi “Pothuajse dje”.

Çmimin "Libri më i mirë për fëmijë”, i cili i mungonte prej vitesh këtij panairi e mori Gaqo Bushaku për librin “Pas Festës së Abetares”.



“Natyrisht që gjithmonë kur mer çmime është një kënaqësi dhe për autorin, megjithatë unë vlerësoj shumë punën që ka bërë Shtëpia Botuese, natyrisht dhe juria” u shpreh shkrimtari Bushaka.
 
 


Ndërsa studiuesi Sabri Hamiti mori çmimin “Libri Studimor” për veprën e tij dedikuar misionarit At Zef Pllumbi.Por si e vlerëson studiuesi Hamiti këtë çmim?

"Një vlerësim për punën që kam bërë, një përdallim mes kolegësh. Padyshim që ka një vlerë ky shpërblim sepse jep mendimin e një jurie profesionale në një krahasim të rezultateve që kanë qenë në panair" tha studiuesi Hamiti".

Në nder të 100 vjetorit të lindjes së shkrimtarit të madh Albert Camus u nda dhe çmimi për përkthimin më të mirë nga veprat e autorit, i cili ju dha Petrit Sinanit për “Mitin e Sizifit”, ndërsa shkrimtarja e ndjerë Hida Halimi u vlerësua me çmimin më të veçantë të jurisë për romanin “Shpina”.

Panairi i librit “Tirana 2013” do të jetë i hapur për lexuesit shqiptarë edhe gjatë ditës së dielë, e cila do të shënojë dhe mbylljen e edicionit të 16-të të tij.