Paqja fiskale/ Rama dialog me sipërmarrësit: Për çdo ‘pasqyrë’ të korrigjuar, fitimi tatohet vetëm 5%! S’ka paqe me ndërtuesit, të deklarojnë pagat e plota

Kur duhen edhe 8 ditë deri në hyrjen në fuqi të paqes fiskale, kryeministri Edi Rama mblodhi biznesmenë e sipërmarrës për të diskutuar mbi paqen fiskale. Theksin e vuri të mundësia e korrigjimit të pasqyrave financiare, kurse ndërtuesve u kërkoi të deklarojnë pagat e plota, si një ndër bizneset që kanë abuzuar më shumë me nëndeklarimin.

Për të diskutuar mbi “Paqen fiskale” që do hyjë në fuqi nga janari i 2026-ës, kryeministri Rama mblodhi komunitetin e biznesit dhe sipërmarrësit, të cilëve u tha se do të kenë mundësinë e korrigjimit të pasqyrave fiskale e të formalizohen, duke nisur nga janari i vitit të ardhshëm.

“Është një instrument për t’u dhënë mundësi të gjitha sipërmarrjeve që nuk janë në konflikt me ligjin dhe që figurojnë në regjistrat e shtetit si kontributorë legjitimë, të rishikojnë pasqyrat e tyre fiskale. Për çdo pasqyrë të korrigjuar, fitimi tatohet vetëm 5%. Kjo rrit formalizimin, nuk cenon integritetin ligjor”, tha Rama.

LEXO EDHE:
Rama vizitë në QSUT: Buxheti për shëndetësinë në 2026 rritet me 50 mln euro, rimbursim të plotë të barnave të Onkologjikut

Nga kjo iniciativë ligjore përjashtohen vetëm ato biznese që janë në konflikt me ligjin, ose në procese gjyqësore me përjashtim të atyre që tërhiqen. Nga “Paqja Fiskale” kryeministri Rama përjashtoi vetëm një sektor, atë të ndërtimit.

“Paqe me ndërtuesit nuk ka. Më keni mbrapa, këmbë këmbës, mua dhe të gjithë ata që varen prej meje. Pastaj keni disa bashki ku mund të bëni çfarë të doni, vazhdoni t’i bëni, por po u kapët, nuk ua ka fajin njeri”, tha Rama.

Protesta që i erdhi nga një prej ndërtuesve të pranishëm në sallë, i cili kërkoi më shumë mbështetje nga shteti, kryeministrin e bëri të ishte edhe më i ashpër.

“Mbështetje juve që akoma deklaroni punonjës me 500 mijë lekë kur e dimë shumë mirë dhe ti dhe unë që nuk ekziston punonjës me pagë minimale në ndërtim. Po nuk keni faj ju, po na ka lidhur duart Gjykata Kushtetuese para disa vitesh që nuk mund t’ju vendosim juve tavan dhe ju lozni.  Ju jeni sektori me më shumë fitim në Shqipëri, çfarë mbështetje kërkoni ju. Jeni sektori ku shfrytëzohet punonjësi më shumë”, tha Rama.

Paqja Fiskale, veç mundësisë së korrigjimit të pasqyrave financiare dhe negociimit të fitimit mes biznesit dhe tatimeve, parashikon edhe fshirjen e borxheve më të vjetra se 10-vjeçare.

K.B/A.A/Shqiptarja.com

TAG:
• edi rama
• paqja fiskale