Pas 5 vitesh dhe 29 ndeshjesh, Gjasula e mbyll me Kombëtaren: Plotësova ëndrrën, tani i hap rrugën të rinjve

Klaus Gjasula nuk do jetë më pjesë e kombëtares shqiptare. 34-vjeçari ka befasuar sot, ku me anë të një postimi në rrjetet sociale, ka njoftuar se nuk do e veshë më fanellën kuqezi pas Evropianit në Gjermani. Mesfushori thotë se ka plotësuar ëndrrën për të luajtur me kombëtaren dhe se tani është koha për ti hapur rrugën të rinjve.

“E kisha ëndërruar gjithmonë të luaja me Kombëtaren dhe e realizova. Isha në një Europian, shënova një gol dhe u ndjeva njeriu më i lumtur. Nëse kthej kokën pas, kam plot momente të bukura me fanellën kuqezi, që nga grumbullimi i parë, te ndeshja debutuese ndaj Francës në “Stade de France” dhe tek ajo e fundit ndaj Kroacisë në Europian. Edhe kur e mendoj tani ende dridhem nga emocionet.

Gjithsesi, me ftohtësi kam gjykuar dhe kam marrë vendimin për t’u tërhequr nga Kombëtarja. Është vendimi i duhur për t’u hapur rrugën të rinjve, që Kombëtarja jonë fatmirësisht ka shumë. Unë e realizova ëndrrën time dhe tani është koha për të tjerë që ta plotësojnë dhe ta jetojnë atë ëndërr.

LEXO EDHE:
Cikalleshi e mbylli me Kombëtaren, FSHF: Mirënjohje, dha kontribut të madh si kuqezi

Pas pesë vitesh do të kem mundësinë të vij në stadium dhe ta mbështes Kombëtaren tonë si tifoz. I jam falënderues Zotit, familjes time dhe të gjithë njerëzve që më kanë qëndruar pranë në çdo moment dhe kanë besuar tek unë.

Në veçanti dua të falënderoj edhe Federatën Shqiptare të Futbollit, Presidentin Armand Duka, trajnerët më të cilët kam punuar, Edoardo Reja dhe Sylvio Mendes Campos Junior, stafin teknik të Kombëtares dhe të gjithë bashkëlojtarët që ndamë këtë rrugëtim, që për mua është më i veçanti.

Sukseset e arritura nuk do të ishin të mundura pa tifozët më të mirë në botë, ata të cilët na kanë mbështetur gjithmonë, si në humbje, fitore apo barazim. Faleminderit nga zemra të gjithë tifozëve kuqezi. Për mua ishte nder dhe krenari të vishja fanellën e Kombëtares!” – shkruan Klaus Gjasula.

Aktualisht Gjasula është pjesë e Ingolstadt në Bundesligën e dytë gjermane.

Ne.k./S.G/Shqiptarja.com

TAG:
• kombetarja shqiptare
• klaus gjasula