Basha: Pse ika nga Holanda dhe i hyra politikës...Shumë shpejt zgjedhje të parakohshme! Investitorët ikin se 'i rreh Rrumi'

Nga Shkodra, kreu  i PD, Lulzim Basha tha se shumë shpejt do të ketë zgjedhje të parakohshme parlamentare dhe lokale. Në përfundim të takimit që pati në Shkodër, Basha nuk dha një datë konkrete se kur do të zhvillohen këto zgjedhje, teksa solli në vëmendje rastin e Shkodrës, ku pas 5 muajsh nga 30 qershori, nuk ka një kryebashkiak legjitim.

"Asnjë bashki nuk ka kryetar. E vetmja situatë ligjshmëri për shkak të paligjshmërisë së 30 qershorit është Shkodra. Por në Shkodër dhe gjithë Shqipërinë do të ketë zgjedhje të ligjshme vendore, zgjedhje të parakohshme parlamentare. Është në dorën e gjithë ne bashkë ta afrojmë këtë datë sa më shumë dhe si pjesë e detyrës time jam sot me qytetarët e Shkodrës në këtë rrugëtim që ka për qëllim mbylljen e kësaj krize dhe afrimin jo thjesht të datës së zgjedhjeve dhe rotacionit politik, por të atij ndryshimi që për nga standardi dhe cilësia të jenë evropiane dhe mos lënë askënd të zhgënjyer në pritshmëri. Për fat të keq PS vazhdon të poshtërohet ditë për ditë nga persona me rekorde kriminale dhe vazhdon të drejtohet nga një grup njerëzish që nuk kanë interes të ndryshojnë. Kjo është kontradikta kryesore. Shumica e shqiptarëve thonë se kështu nuk vazhdohet më. Një grusht njerëzish grabisin pasuritë e shqiptarëve. Ndaj detyra jonë është të bashkohemi të formulojmë zgjidhjet me anë të cilës do t'i japim fund jo vetëm kësaj krize ekonomike, por do të projektojmë një qeverisje që t'i takojë qytetarëve dhe të pamundësojmë që kushdo parti politike ta kthejë shtetin në pronë private", tha Basha.

Investimet e huaja, ka qenë një nga çështjet që Basha diskutoi me të rinjtë shkodranë, në takimin e tij në kuadër të "Rugëtimit për Shqipërinë". Kryedemokrati akuzon kryeministrin Edi Rama dhe qeverinë e tij se ka larguar investitorët e huaj. Një nga arsyet, tha Basha, është se Rama është i lidhur me bandat dhe si shembull konkret Landi Muharremin, e njohur me nofkën "Rrumi" që rrahu investitorin libanez Fadi Mitri.

“Ne kemi një qeveri që zhgërryhet në drogë dhe krim, ndaj duhet ta ndryshojmë. Të huajt nuk vijnë të investojnë se këtu iu thonë: Hajde se të rreh Rrumi dhe të tjerët. Prandaj nuk vijnë. Investimet e huaja të vetme janë ato të ardhura para 8 vitesh”, tha Basha.

Kreu i Partisë Demokratike, Lulzim Basha, si paraardhësi i tij, ka akuzuar qeverisë si porositëse të atentatit Arjan Ndoja në Shkozet të Durrësit. Nga Shkodra, në takimin në kuadër të turit "Rrugëtimi për Shqipërinë', Basha tha se Ndoja i doli kundër qeverisë, për këtë arsye këto të fundit "i treguan kallashin".

“A e patë se çfarë bëri Rama në Shkodër, vuri një person që e kapte dekriminalizimi. Ashtu veproi edhe në Vorë me Agim Kajmakun, edhe në Vaun e Dedës me Mark Babanin. Shqiptarët shkëlqejnë kudo, ndërsa këta zgjedhin kriminelët në krye. Po ashtu, ndodhi edhe me një prokuror, të cilin edhe ne e kemi denoncuar për lidhje me krimin, që  kur preku interesat e tyre, i treguan kallashin. Beteja bëhet për tokat në Gjirin e Lalëzit, ku bandat qeveritare luftojnë me kallash e nuk lejojnë askënd t’i prekë në interesa”, tha Basha.

Kreu i PD-së, Lulzim Basha tha se informacionin se disa prej kryebashkiakëve kanë të shkuar kriminale e ka marrë nga vetë socialistët, me argumentin se ata ishin të poshtruar se brenda partisë nuk kishte garë.

"Dhe gënjyen si derri. Për një muaj me radhë gënjyen, edhe pse e dinin fare mirë. Ne nuk kemi ndonjë shkop magjik që i marrim vesh se kush janë këta. Vetë nga Partia Socialiste na thonë se ky është me rekorde kriminale apo ai tjetri. Sepse edhe ata ndihen të poshtëruar dhe të turpëruar. Një pjesë e mirë e socialistëve të thjeshtë. E njëjta gjë me Kajmakun e Vorës apo Babanin e Vaut të Dejës. Dhe në një proces që nuk kishte garë", tha Basha.