Gupi iranian Homeland Justice ka njoftuar se ka kryer një sulm kibernetik ndaj Postës Shqiptare.

Përmes një postimi në faqen e tyre në Telegram, Homeland Justice ka shkruar se ky sulm është kryer për shkak të bashkëpunimit të vazhdueshëm me muxhahedinët (opozitën iraniane), një pjesë e të cilëve ndodhen në kampin në Manëz të Durrësit.

Teksa paralajmërojnë për sulme më shkatërruese, Homeland Justice shkruan se SHBA dhe Izraeli kanë kontrollin e plotë të Postës shqiptare, duke i shndërruar zyrtarët e saj në skllevër dhe shërbëtorë.

Përmes një kërkimi të thjeshtë nga Report Tv, faqja zyrtare në web e Postës Shqiptare rezulton të shfaqë problematika dhe të mos jetë plotësisht e aksesueshme për qytetarët.

Më herët, Posta Elektronike e Kuvendit të Shqipërisë ra pre e një sulmi kibernetik, pas të cilit qëndron një grup iranian i quajtur “Homeland Justice”. Departamenti i Drejtësisë në SHBA njoftoi pak ditë më parë se kishte bllokuar 4 domain-e që i përkasin grupeve të hakerave iranianë, të përdorura për të sulmuar infrastrukturat e shteteve armike me Iranin, shpërndarjen e të dhënave të vjedhura dhe nxitje të dhunës ndaj kundërshtarëve të regjimit iranian.

Mes këtyre faqeve ishte dhe ajo e Homeland Justice dhe Karma Below, një grup hakerash që ka kryer disa sulme kibernetike drejt infrastrukturës shtetërore shqiptare.

Po ashtu kujtojmë se Kuvendi i Shqipërisë miratoi me 79 vota pro rezolutën e PS për shpalljen e Iranit shtet sponsor të terrorizmit, ndërsa i kërkoi qeverisë të shpallë grup terrorist, Gardën Revolucionare  dhe Hezbollaun.

Njoftimi i “Homeland Justice”:

Infrastruktura e Postës Shqiptare u sulmua nga Duart e Fuqishme të Drejtësisë së Atdheut

Posta Shqiptare u sulmua nga Patriotët e Drejtësisë së Atdheut për shkak të bashkëpunimit të saj të vazhdueshëm dhe të vazhdueshëm me terroristët e Muxhahedinëve dhe lehtësimit të rrugës së të këqijave dhe akteve terroriste të këtij grupi.

Zyrtarët e korruptuar të Postës Shqiptare, të cilët ua kanë dhënë autoritetin e tyre të plotë pedofilëve të Regjimit Epstein dhe nuk kanë asnjë liri veprimi dhe pavarësi të tyre, janë shndërruar në shërbëtorë dhe skllevër të papaguar të terroristëve të Kampit Ashraf 3 për disa muaj.

Meqenëse ekzistenca e këtyre terroristëve nuk ka sjellë gjë tjetër veçse fatkeqësi dhe vuajtje për popullin fisnik të Shqipërisë, Drejtësia e Atdheut e konsideroi detyrën e saj të ndërmarrë veprime kundër këtij institucioni të korruptuar në qeveri.

Veprimet tona të ardhshme do të jenë më të vështira, më shkatërruese dhe më të kushtueshme....

Lajm në përditësim...