Nga dëmshpërblimi i bizneseve te ndëshkimet financiare e penale për dhunuesit në protesta, Rama prezanton një paketë të gjerë masash: Kush thyen paguan! Dje në Tiranë mercenarë nga Spanja! Akuza për PD: Strehë e dhunës

Kryeministri Edi Rama akuzoi organizatorët e protestave se po nxisin, paguajnë dhe orkestrojnë persona për të ushtruar dhunë në qendër të Tiranës. Sipas tij, qëllimi nuk është një Shqipëri më e mirë, por kthimi i vendit pas, në një kohë kur, siç u shpreh ai, Shqipëria është pranë anëtarësimit në Bashkimin Europian. “Këtë herë nuk do t’ia dalin. Zhurmën e kanë të madhe, shanset zero”, deklaroi Rama, duke theksuar se personat që djegin dhe shkatërrojnë nuk përfaqësojnë as shumicën dhe as pakicën e shqiptarëve.

"Kjo është përgjigja jonë ligjore ndaj dhunës dhe anarkisë urbane të ushqyer nga duar të mbrapshta dhe një turmë dhunuesiosh që mund ta shohë e gjithë Shqipëria se kush i sjell në qendër të Tiranës duke i nxitur, paguar e orkestruar jo për një Shqipëri më të mirë por për ta kthyer mbrapsht kur jemi më pranë pikëmbërritjes e kur flamuri i Ismail Qemalit është ngritur më lart se kurrë. Por këtë herë nuk do tia dalin. Ai që thyen, djeg, shkatërron qendrën e Tiranës dhe përmes ekraneve të korruptuara terrorizon Shqipërinë nuk është populli, as shumica as pakica e popullit. Për shumicën që me ka dhënë mandatin dhe pakicën që smë ka votuar por pret më shumë drejtësi në shpërndarjen të ardhurave do flas në ditët e para të javës me risitë e buxhetit 2027 që të jetë e qartë se nuk do jenë zotime të rastet por vendime konkrete. Durim dhe Kurajo. Duhet ta kalonim këtë se jo të gjithë e duan paqen dhe suksesin e Shqipërisë. Është përpjekja e fundit përpara se ne ta vulosim faqen e fundit të anëtarësimit të Shqipërisë në BE. Zhurmën e kanë të madhe, shanset 0. Mos harroni asnjëherë, më keni votuar apo jo, unë3 nuk e kam tradhëtuar asnjëherë misionin që më ka dhënë besën shumica e Shqipërisë dhe shqiptarëve dhe sdo ta tradhëtoj kurrë besimin e asnjë shqiptari që e do Shqipërinë më të mirë dhe flamurin e Ismail Qemalit dhe Skënderbeut në rradhë me shtetet e BE-së"

Kryeministri Edi Rama deklaroi sot se kushdo ka të drejtë të kërkojë largimin e tij dhe të protestojë kundër qeverisë, por theksoi dorëheqja nuk mund t'i imponohet përmes dhunës. 

"Të dashur miq, kjo paketë nuk ka asnjë shpikje alla shqiptarçe. Nuk ka asnjë pikë apo nen që bie ndesh me lirinë dhe të drejtat e qytetarëve të Shqipërisë. Në frymën e saj ka një të vërtetë shumë të thjeshtë: liria e secilit mbaron aty ku fillon liria e të tjerëve dhe të drejtat e gjithkujt ndalen aty ku cënohen të drejtat e të tjerëve. Kush nuk e do qeverinë apo do largimin tim, jo sot po dje, është në lirinë dhe të drejtën e tij ta mendojë, propagandojë apo kthejë në protestë këtë dëshirë. Këtu është detyra ime dhe e qeverisë që të garantojë  se protesta e kujtdo që do një qeveri tjetër të zhvillohet pa asnjë trysni. Unë jam i gatshëm të dëgjoj këdo që do më parashtrojë kundërshtimin e tij ballë për ballë dme kërkesat që mendon se qeveria duhet të marrë parasysh. Kush kërkon dorëheqjen time, gabon duke menduar se mund tëq imponohet me dhunë apo me ccdo formë tjetër. Përtej këtij kufiri unë kam detyrë të mbroj vendin dhe njerëzit nga  cdo përpjekje për ta kthyer Shqipërinë mbrapa ndërsa shteti ka për detyrë ti tregojë vendin çdokujt që ngre dorën kundër pronës publike e private që kërcënon rendin dhe sigurinë" tha Rama

Kryeministri Edi Rama ka publikuar paketën e re ligjore, kundër protestave të dhunshme që po zhvillohen prej disa ditësh në Tiranë.

Rama prezantoi 6 instrumentat, që sipas tij i japin një goditje dhunës së shkaktuar nga ata që duan të marrin peng popullin shqiptar dhe Qeverinë.

Ndër masat e bëra publike nga Rama, parashikohet dëmshpërblimi i bizneseve të dëmtuara gjatë protestave të dhunshme, detyrimi i shkatërruesve për të paguar për dëmet e shkaktuara, krijimi i një regjistri me emrat e personave që ushtrojnë dhunë, një kod etike për mësuesit e arsimit parauniversitar, ndryshime në kodin penal dhe në ligjin për tubimet, si dhe sanksione për protestuesit që pengojnë jetën normale të qytetarëve.

Rama tha gjithashtu se gjatë protestës së zhvilluar dje në Tiranë, një grup protestuesish të veshur me bluza të bardha kishin ardhur nga Spanja si mercenarë, me qëllim për të nxitur e ushtruar dhunë.

“Pas një pune intensive në bashkëpunim me partnerët europianë, bazuar në jurisprudencën e gjykatës europiane, në koordinim me partnerët italianë e francezë, duke u mbështetur në ekperiencën e tyre kundër kësaj flame anti-demokratike, kemi gati paketën ligjore të masave kundër dhunës dhe anarkisë urbane. Kjo paketë parashikon që protesta qytetare mbrohet, dhuna ndëshkohet dhe dëmi paguhet nga shkaktari. Përgjegjësia është gjithmonë vetiake. Paketa përbëhet nga 6 instrumenta që plotësojnë njëri-tjetrin.

Akti për dëmshpërblimin e biznesit të vogël vjen si një mbështetje financiare, ku shteti do të mbulojë nga 100% të dëmeve për bizneset e vogla, në 70% të dëmeve për bizneset e mëdha. Ata që u përfshinë në ato akte, do të paguajnë secili pjesën e vetë të gjobës. Për dëmet e shkaktuara nga të miturit, dëmshpërblimi do kalojë te prindërit.

Ligji zbatohet për të gjitha grumbullimet. Askush nuk paguan dëmin pse ka protestuar. Ky ligj nuk e kufizon lirinë e tubimit dhe të shprehjes. Kush zgjedh të qëndrojë në një grup duke e ditur që përreth tij po thyhet dhe po shkatërrohet, do të përgjigjet përmes gjobës, bashkë me ata që i kryejnë veprimet e dhunshme. Gjoba do të shkojë deri në 500 mijë lekë të reja.

Ndryshimet për ligjin për tubimet. Ligji për tubimet është i vitit 2001. Ai nuk parashikon asgjë për mjetet dixhitale. Ndryshimet i japin policisë kapacitete parandaluese për vende publike dhe më të ndjeshme, aftësi reaguese për fenomenin e thirrjes për dhunë në rrjetet sociale. Konkretisht perimetra sigurie rreth objekteve të ndjeshme. Kur identifikon një thirrje për dhunë në rrjetet sociale, Policia i dërgon një njoftim menjëherë për fshirjen e njoftimit. Nëse nuk fshihet, Policia vepron përmes ndjejes penale.

Identifikimi i personave të maskuar. Sot në ligjin ekzistues prania e personave të maskuar në protestë është e ndaluar. Por ne do ta përfshijmë këtë në kodin penal.

Sanksione të parashikuara. Nuk ndodh askund në asnjë vend të BE që një grup njerëzish të ushtrojë arbitrarisht lirinë e protestës, duke u mohuar të tjerëve lirinë e lëvizjes në qytet, duke u penguar punën dhe shkollën. Pjesëmarrja në një tubim pa leje, mos-dëgjimi i thirrjeve për shpërndarje dhe fshehja e identitetit do të gjobiten deri në 500 mijë lekë të reja për çdo pjesëmarrës. Ndërsa bllokimi i qarkullimit do të gjobitet me 5 mijë lekë të reja.

Me VKM krijohet regjistri i posaçëm elektronik i personave të referuar ose nën hetim për vepra penale kundër shtetit. Ky regjistër administrohet nga Policia dhe përmban të dhënat e identifikimit të këtyre shtetasve. Do u refuzohet dalja nga vendi personave që synojnë t’i shmangen veprave penale. Do njoftohen edhe autoritetet e huaja për rrezikshmërinë që ai paraqet. Përfshi edhe kompanitë e transportit ajror, detar apo me tren. Të jetë i bindur çdo person, qoftë si ata me bluza të bardha dhe me maska që kishin ardhur dje si mercenarë për të ushtruar dhunë, dhe që tregonin muskujt para Ministrisë së Arsimit, se kush do të dhunojë në Shqipëri do të gjejë belanë për të rihyrë i qetë në Europë, pa mbaruar punë me drejtësinë këtu në Tiranë.

Kodi i etikës për mësuesit e arsimit parauniversitar. Asnjë mësues nuk mundet t’i çojë fëmijët në protesta të paligjshme, duke përdorur autoritetin e tij. Kush e bën do pezullohet apo përjashtohet.

Ndryshimet në kodin penal, ndjekin praktikat më të mira të vendeve të BE-së. Këto dispozita ndëshkojnë dhunën, nxitjen e saj, kanosjen dhe përndjekjen. Ato e përjashtojnë shprehimisht protestën paqësore, kritikën politike, satirën dhe gazetarinë. Kush kapet me armë apo sende të tjera të paligjshme dënohet deri në 2 vite burg. Shkatërrimi i pronës gjatë tubimeve dënohet më rëndë sesa aktualisht. Dënimi më i rëndë shkon kur thirrja u drejtohet fëmijëve.

Fshehja e fytyrës, gjobë deri 6 muaj burg (kur në protest ka dhunë). Nuk ndëshkohet kush e zbulon fytyrën sapo dëgjon urdhrin e policisë. Shkatërrimi i pronës (dënim dyfish kur prek shkolla, etj). Goditje ndaj policëve apo qytetarëve, rritje me 1/3 e dënimit kur është i maskuar. Nxitja për dhunë në rrjetet sociale, plackitje, etj. Dënimi më i rëndë kur thirrja u drejtohet fëmijëve, ose kur pas saj ndodh dhuna. Kanosja online, dënim më i gjerë.

Kush publikon të dhëna që ekspozojnë persona ndaj sulmeve, bëhet objekt i kodit penal. Përdorimi i AI kur i shkaktojnë dëm personit bëhet vepër penale (jo satira etj). Kanosja ndaj funksionarëve dhe familjeve të tye, personave publikë dhe familjeve të tyre, janë vepra penale. Mbrohen edhe nga kanosja online por me dënim më të ashpër”, tha mes të tjerash Rama.

Kryeministri Edi Rama ka prezantuar ndryshimet e reja për tubimet, të cilat parashikojnë vendosjen e perimetrave të sigurisë rreth objekteve të ndjeshme dhe mundësinë që policia të kufizojë tubimet deri në 72 orë pranë institucioneve arsimore, shëndetësore dhe objekteve të kultit.

Për thirrjet për dhunë në rrjetet sociale, fillimisht do të kërkohet fshirja e postimit, ndërsa në rast refuzimi policia mund të nisë procedimin penal sipas veprave ekzistuese. Ndryshimet parashikojnë edhe trajtimin si vepër penale të fshehjes së identitetit gjatë tubimeve, sipas modelit francez.

Për mosbindje ndaj policisë parashikohen gjoba nga 10 mijë deri në 100 mijë lekë, ndërsa për bllokimin e qarkullimit gjoba do të jetë 5 mijë lekë për çdo pjesëmarrës.