KOSOVE- Marrëveshja për ekstradimin e firmosur mes Kosovës dhe Zvicrës do t'ju vijë në ndihmë qytetarëve kosovarë, të cilët janë të dënuar në burgjet e shteteve të ndryshme evropiane. Por kjo nuk vlen për të burgosurit, të cilët gjenden në burgjet e shtetit serb, për shkak të raporteve aktuale ndërmjet dy vendeve.

“Qytetarët e Kosovës që kanë pasaportën e Kosovës, që kanë shtetësinë e Kosovës, do ta gëzojnë mbrojtjen e Republikës së Kosovës kudo që gjenden në vendet e tjera. Do të jemi të kujdesshëm që ata të mos ekstradohen në asnjë vend, po në veçanti do të thosha në Serbi ku kryekëput aktakuzat e tyre janë me motive politike”, ka deklaruar Kuçi. Nga fletë-arrestet që Serbia i ka lëshuar nëpër botë, nëpërmjet Interpolit dhe Europolit, kanë rënë viktimë një numër i konsiderueshëm i qytetarëve të Kosovës. Madje, disa qytetarë kosovarë vazhdojnë ende të qëndrojnë në burgjet serbe.

Ndërkaq ambasadorja e shtetit zviceran, Kristina Marti, ka thënë se me nënshkrimin e marrëveshjes për ekstradimi ndërmjet Kosovës dhe Zvicrës, transferimi i kosovarëve nga Zvicra do të jetë më i lehtë. “Kjo marrëveshje u mundëson personave të dënuar në një vend tjetër, që dënimin e tyre ka kryejnë në vendin e tyre”. “Kjo bëhet e mundur përmes një instrumenti modern, i cili i merr parasysh zhvillimet e fundit në fushën e transferimit të personave të dënuar ashtu siç është e rregulluar edhe nga Këshilli i Evropës”, ka sqaruar ambasadorja Marti.

Ndërkaq për shkak të mosanëtarësimit në Interpol, Kosova nuk mund të kërkojë shfuqizimin e fletarrestimeve të lëshuara nga Serbia, të cilat i konsideron politike. 

(jd/shqiptarja.com)