Pashkët/ Meta mesazh edhe politikës: Reflektim për më shumë bashkëpunim

Presidenti i Republikës, Ilir Meta vizitoi sot Katedralen “Ngjallja e Krishtit” në Tiranë ku u prit nga Kryepeshkopi i Shqipërisë, Fortlumturia e Tij Anastasi dhe klerikë të tjerë të Kishës Ortodokse Autoqefale të Shqipërisë.

Presidenti Meta uroi drejtuesit e lartë dhe të gjithë besimtarët, ndërsa i dërgoi një mesazh indirekt edhe politikës për më shumë reflektim dhe bashkëpunim. “Kjo është një ditë e jashtëzakonshme kundër dëshpërimit dhe fatalitetit, si dhe e shpresës dhe e entuziazmit për një të ardhme më të mirë.

Është një ditë e triumfit të jetës mbi vdekjen, të së mirës mbi të keqen, të shpresës mbi frikën dhe mbi pasigurinë. Është një ditë, që na bashkon të gjithëve e që na ndihmon të reflektojmë për më shumë bashkëpunim dhe harmoni, për të mirën e përbashkët” – u shpreh Presidenti Meta.

Meta apeloi edhe dje për dialog, kur u shpreh se me besimin në Zot dhe me dialog e vëllazërim, shoqëria jonë mund të tejkalojë çdo sfidë, pavarësisht sakrificave, për të ecur e sigurt drejt së ardhmes më të mirë, në familjen europiane.

 

Lajmi kryesor:

'Krishti u ngjall'! Ortodoksët kremtojnë Pashkët, në Fier s'ka paqe politika, Meta: Reflektoni! (VIDEO)

//Shqiptarja.com

TAG:
• pashket ortodokse