PD:42 ditë heshtje, faktet rëndojnë 
më shumë sa më tepër kohë kalon

TIRANË - Koordinatorja për mediat e Partisë Demokratike, Silvi Bardhi në konferencën e saj për shtyp i ka rikujtuar opinionit publik faktet, sipas institucionit që përfaqëson, mbi inkriminimin dhe dhunën në Parlament. Duke përmendur faktin se 42 ditë kanë kaluar nga akuzat e para mbi kryeministrin Rama dhe supozimeve të lidhjeve të këtij të fundit me krimin, Bardhi paralajmëroi se “faktet rëndojnë më shumë sa më shumë kohë kalon dhe sa më shumë thellohet papërgjegjshmëria e mosllogaridhënia e Kryeministrit”.
 
Duke i’u referuar rastit të deputetit Ndoka, Koordinatorja e PD, Bardhi ripërsërit akuzat ndaj këtij të fundit për precedentë penal në shtetin fqinj Itali dhe e cilëson si vegël të Kryemisnistrit Rama “për të shantazhuar opozitën, për ti mbyllur asaj gojën”. Këto “fakte” njihen, sipas sajë, prej 42 ditës nga të gjithë.
 
Më poshtë deklarata e plotë e Koordinatores për mediat e Partisë Demokratike, Silvi Bardhi.
“Çdo qytetar i vendit ka mësuar se Edi Rama i ka hapur dyert e Parlamentit, deputetëve me precedent penalë, si Arben Ndoka, i dënuar me 7 vite burg për shfrytëzim prostitucioni dhe rrëmbim personi.

Dhe çdo qytetar i vendit u bë dëshmitar i skenarit të Ramës, të goditjes dhe kërcënimit me jetë të përfaqësuesve të opozitës, prej këtyre deputetëve.

Ka mesa duket një arsye të fortë, pse Edi Rama ka futur në parlament deputetë me të kaluar kriminale.

Për të shantazhuar opozitën, për ti mbyllur asaj gojën.

Por letrat janë hapur dhe tashmë gjithë publiku i di emrat, faktet provat.

Edi Rama hesht prej 42 ditësh, pavarësisht se ai është hartuesi i skenarëve të dhunës anti-opozitë. Pavarësisht se me firmën dhe vulën e tij gëzojnë sot mandatin dhe imunitetin e deputetit persona me precedent penalë.
Faktet e inkriminimit të Parlamentit nuk heshten dot, dhe pse hesht Edi Rama prej 42 ditësh.

Përkundrazi, faktet rëndojnë më shumë sa më shumë kohë kalon dhe sa më shumë thellohet papërgjegjshmëria e mosllogaridhënia e Kryeministrit.”

Redaksia Online
(e.n/shqiptarja.com)