Në 6 orët e seancës së të enjtes në  parlament, palët politike prodhuan kaos dhe përplasje mes tyre. Situata në disa momente degradoi me gjuhë verbale të rëndë deri në kërcënime dhe me fyerje e akuza personale. 

***

“Në emër të grupit parlamentar të Partisë Socialiste, sot më 2 prill, do ishte në nderin e Kuvendit të Shqipërisë të merrnim edhe 1 minutë heshtje, në përkujtim të 4 dëshmorëve të demokracisë.”

Ajo që duhej të ishte një moment solemn në Kuvend, u shndërrua në një skenë të njohur tashmë për politikën shqiptare: zhurmë, përplasje dhe akuza pa fund.

Demokratët e quajtën provokim. Flamur Noka u ngrit i pari në foltore, i ndjekur nga të tjerë deputetë të opozitës, duke e kthyer sallën në një arenë ku fjala nuk dëgjohej më.

Në të paktën dy raste, demokratja Elda Hoti tentoi të ndërpresë fjalën e deputetes socialiste Bora Muzhaqi.

Ndërhyrja e kreu i grupit socialist, Taulant Balla, në mbrojtje të deputetëve të tij, i acaroi më tej demokratët. Për disa minuta, Kuvendi u kthye në një duel verbal mes Ballës dhe Hotit.

Në këtë klimë tensioni, Flamur Noka nuk ndalej duke kërkuar përjashtimin e Ballës nga seanca, mes një lumi akuzash dhe fyerjesh.

“Nxirre përjashtë, nxirre përjashtë… është dhunues, është narko… nxirre përjashtë këtë të pafytyrë…”,- tha Noka.

Kur Kamerat fiken, sherret verbale kthehen në kërcënime!

 “Do të të rrjep si kec…”,- iu drejtua Noka Ballës.

Albana Vokshi doli nga vetja teksa Bora Muzhaqi fliste nga vendi, duke shtuar edhe më shumë tensionin në sallë.

Ndërhyrja e Topallit ishte si një rikthim në kohë, dhe gati një dëshmi e një politike të mbetur vendnumëro

 “Kam vetëm një shprehje për të. Merre zoti kryetar: Kape për zhelesh e nxirre jashtë",- tha Topalli.

As kryeparlamentari Niko Peleshi nuk i shpëtoi përplasjes verbale, duke u detyruar të sqarojë publikisht një etiketim që i erdhi nga opozita.

“Nuk është fjalor parlamentar ky: Gjynafqar. Nuk jam gjynafqar fare sepse thjeshtë po të shpjegoj rregulloren”,- tha Peleshi.

Në fund, si zakonisht, pas zhurmës vijnë procedurat. Socialistët kërkuan në sekretariatik për etikën përjashtimin e Flamur Nokës me 60 ditë dhe të Elda Hotit e Albana Vokshit me 30 ditë, ndërsa PD kërkon përjashtimin e Taulant Ballës 60 ditë.

Kërkesa e plotë e PD:

Të nderuar kolegë,

Kërkesë për marrjen e masës disiplinore "Përjashtim nga pjesëmarrja në komisione dhe në seancë plenare 60 dite" ndaj deputetit recidivist Taulant Balla.

Sekretariatit për Procedurat, Votimet dhe Etikën

Në datën 02.04.2026, ora 10:00 është zhvilluar seanca plenare e Kuvendit të Shqipërisë. Ndërkohë që deputetja Elda Hoti kërkonte nga deputetja Bora Muzhaqi që të ndërpriste fjalën, pasi ishte rradha e saj për të folur e mohuar padrejtësisht nga kryetari i Kuvendit Niko Peleshi, kryetari i Grupit Parlamentar të Partisë Socialiste, deputeti Taulant Balla është ngritur në këmbë dhe i është drejtuar me disa shprehje fyese dhe kërcënuese deputetes Hoti. Kjo gjuhë fyese, ofenduese, diskriminuese dhe kërcënuese ka sjellë reagimin e menjëhershëm të Grupit Parlamentar të Partisë Demokratike, i cili ka kërkuar nga kryetari i Kuvendit Niko Peleshi të marrë masën disiplinore të përjashtimit nga seanca plenare ndaj deputetit Taulant Balla. Në kushtet e refuzimit për marrjen e masës disiplinore, seanca është ndërprerë dy herë dhe më pas është kaluar në votimin e projektligjeve pa diskutim, në shkelje flagrante të lirisë së shprehjes të deputetëve të regjistruar për të folur, të garantuar nga Kushtetuta dhe Rregullorja e Kuvendit.

Po gjatë të njëjtës seancë deputeti Taulant Balla, ka përdorur gjuhë jo parlamentare dhe që cënon dinjitetin ndaj deputetit Fatmir Mediu. Ai arriti deri aty sa në përfundim të fjalës ju drejtua me fjalët "ik pirdhu", në seancë plenare.

Neni 62 i Rregullores ka përcaktuar se: "1. Deputeti gjatë ushtrimit të mandatit respekton rregullat bazë për standardet e sjelljes, të parashikuara në këtë Rregullore dhe në Kodin e Sjelljes së Deputetit. 2. Rregullat e përcaktuara në këtë kre dhe masat disiplinore zbatohen për shkeljen e Rregullores dhe të Kodit të Sjelljes së Deputetëve.". Ndërsa, neni 63 i Rregullores ka parashikuar masat disiplinore që zbatohen ndaj deputetit, ndër të cilat, edhe "d) përjashtim nga pjesëmarrja në komisione dhe/ose në seancë plenare deri në 10 ditë, 30 ditë ose 60 ditë.".

Më tej, neni 65/1 i Rregullores ka detajuar rastet kur jepet masa disiplinore "Përjashtim nga pjesëmarrja në komisione dhe/ose në seancë plenare deri në 10 ditë, 30 ditë ose 60 ditë", ku, ndër të tjera, janë parashikuar edhe rastet kur deputeti fyen dhe kërcënon deputetët e tjerë. Kërkesa për marrjen e një mase të tillë paraqitet me shkrim nga jo më pak se 7 deputetë dhe jo më vonë se 24 orë nga dita e seancës plenare. Neni 65/2 e Rregullores parashikon procedurën që ndiqet nga Sekretariati për Procedurat, Votimet dhe Etikën për shqyrtimin e kërkesës për marrjen e masës disiplinore.

Rregullorja e Kuvendit ka referuar në mënyrë të përsëritur tek Kodi i Sjelljes së Deputetit, miratuar me vendimin nr. 61/2018 të Kuvendit të Shqipërisë, i cili në nenin 3 ka parashikuar se: "Deputeti, gjatë ushtrimit të mandatit, duhet: ë) të jetë model për zgjedhësit dhe të sillet në mënyrë që të nxisë zbatimin e standardeve më të larta të sjelljes edhe për të rinjtë që përfshihen në politikë,". Ndërsa, neni 5 i Kodit parashikon: "1. Deputeti, gjatë ushtrimit të mandatit, shfaq standardet më të larta të sjelljes së qytetëruar, dinjitoze dhe të etikës parlamentare korrekte.".

Më tej, në nenin 6 të Kodit parashikohet: "1. Përdorimi në Kuvend i gjuhës së pahijshme, fyese ose kërcënuese, ofendimet dhe sulmet fizike personale janë rreptësisht të ndaluara. 2. Deputeti i ndalohet: a) të përdorë një gjuhë të shprehuri, e cila nxit urrejtjen në bazë të racës, gjinisë, moshës, origjinës kombëtare, përkatësisë etnike, besimit fetar, prejardhjes sociale, aftësisë së kufizuar, gjendjes ekonomike, arsimore, shoqërore ose shëndetësore, gjendjes civile, familjare ose martesore, orientimit seksual, identitetit gjinor, përgjegjësisë prindërore, predispozicionit gjenetik, përkatësisë në një grup të veçantë ose për çdo shkak tjetër; b) të shfaqë forma diskriminimi dhe stereotipizimi në komunikimin e përditshëm, në fjalime politke, në veprimtari parlamentare ose jashtëparlamentare ku merr pjesë. 3. Në rast të shkeljeve të parashikuara në pikat 1 dhe 2, të këtij neni, ndaj deputetit zbatohen masat disiplinore, sipas procedurave të përcaktuara në Rregulloren e Kuvendit.".

Duke u kthyer në rastin konkret, rezulton se kryetari i Grupit Parlamentar të Partisë Socialiste, deputeti Taulant Balla ka përdorur gjuhë fyese, ofenduese, diskriminuese dhe kërcënuese, tërësisht të papranueshme në drejtim të Sekretares së Grupit Parlamentar të Partisë Demokratike, deputetes Elda Hoti, duke cënuar rëndë dinjitetin dhe sigurinë e saj fizike. Kjo gjuhë fyese dhe kërcënuese dëmton rëndë reputacionin dhe besimin e qytetarëve tek Kuvendi dhe deputetët, si dhe përhap mesazhin e normalizimit të njjë gjuhe të tillë ndaj vajzave dhe grave. Kjo sjellje e deputetit Balla është e përsëritur, pasi po i njëjti në seancën plenare të datës 05.03.2026, përdori gjuhë fyese dhe seksiste ndaj deputetes Albana Vokshi, duke iu drejtuar: "Thame t'ju pyesim ju njëherë, po s'kishim kohë. Realisht, realisht, realisht, realisht nuk kishim një numër telefonin tuajin që t'ju merrnim në telefon dhe t'ju thonim ore si mendoni ju për këtë. Po, 0900 se për ty kam këtë numrin, për ty Albana padyshim.".

Në këtë kuptim, kjo kërkesë synon që nëpërmjet ndëshkimit disiplinor të deputetit Taulant Balla të parandalojë përsëritjen e rasteve të ngjashme në të ardhmen nga vetë recidivisti Balla apo edhe kolegë të tjerë deputetë që nuk respektojnë as normat më minimale të etikës në raport me koleget vajza dhe gra, deputete të Kuvendit të Shqipërisë. Prandaj, duke pasur parasysh sa më sipër, në mbështetje të neneve 62, 63, 65/1 dhe 65/2 të Rregullores së Kuvendit të Shqipërisë, dhe neneve 3, 5, dhe 6 të Kodit të Sjelljes së Deputetit, kërkojmë marrjen e menjëhershme të masës disiplinore "Përjashtim nga pjesëmarrja në komisione dhe në seancë plenare 60 dite" ndaj deputetit Taulant Balla.

(Kërkesa e PD)