PD, Shehu: Testimi i infermierëve 
 i fshehtë, të anullohet ky proces

Testimi i infermierë është konsideruar si një proces i fshehtë  nga Partia Demokratike, e cila përmes deputetit Tritan Shehu ka kritikuar testin e infermierëve të paralajmëruar në ditët e fundit nga qeveria.

“Për habinë e të gjithëve, i ashtuquajturi “testim”, i iniciuar si një mjet seleksioni arbitrar e presioni mbi personelin shëndetësor, u rishfaq përsëri”, ka deklaruar Shehu. 

Shehu ka akuzuar Ministrinë e Shëndetësisë se, “me një komunikim aspak transparent urdhëroi drejtoritë e institucioneve shëndetësore që në periudhën 24 korrik - 2 gusht të kryejnë “testimin” e infermierëve të vendit”. 

Ja fjala e plotë e deputetit demokrat

Për habinë e të gjithëve i ashtuquajturi “testim”, i iniciuar si një mjet seleksioni arbitrar e presioni mbi personelin shëndetësor, u rishfaq përsëri.
Ministria e Shëndetësisë me një komunikim aspak transparent urdhëron drejtoritë e institucioneve shëndetësore që në periudhën 24 korrik- 2 gusht të kryejnë “testimin” e infermierëve të vendit. Sipas urdhrit në fjalë ky testim do të fillojë me 24 korrik me infermieret e spitaleve obstetrike-gjinekologjike të Tiranes dhe atij "Shefqet Ndroqi".

Në tërësi në të gjithë këto veprime është mbajtur një regjim fshehtësie i plotë. Urdhri i Infermiereve, shërbimet universitare, fakultetet perkatese etj, nuk kanë asnjë njoftim dhe nuk kanë marrë pjesë në përgaditjen përkatëse. Nuk është bërë publik asnjë dokument shpjegues, platformë a pyetsor. Ky proces kërkohet të realizohet pa pritur opinionin e Gjykatës së Lartë ndaj ankesës së Urdhërit të Infermierëve për këtë inisiative tha Shehu gjatë fjalës së tij
 
Dhe për me tepër, e gjithë kjo kërkon të kryhet pikërisht në këtë periudhë kulminante pushimesh, pra jashtë vëmëndjes së opinionit publik mjekësor !
Nga ana tjetër, kjo iniciativë po përsëritet në mënyrë krejt të njëanshme, në një kohë kur në Komisionin Parlamentar e Kuvend dominoi vullneti i përbashkët për ndryshimet e ligjit të edukimit të vazhduar.

Kështu, tashmë në këtë ligj përfshihet i gjithë personeli shëndetësor, pra dhe infermieret. Në këtë mënyrë, ky vendim bie ndesh edhe me këto ndryshime ligjore, qe do të hyjnë ne fuqi mbas pak ditësh, pavarësisht vendimit të kaluar të "Gjykatës Aministrative".
Në këto kushte ne kërkojmë anullimin e këtij "testimi", pritjen e hyrjes në fuqi  të ndryshimeve të fundit ligjore, si dhe përcaktimin më tej të një procedure të qartë e të plotë për edukimin e vazhdueshëm të infermiereve, në baze të së cilës duhet te procedohet.
 
Redaksia online
(S.M/shqiptarja.com)