Grabitje në Peqin/ Rrëfimi: Një vajzë më tha 'të përdor pak tualetin', na morën 60 mijë Euro

Një tregtar rrobash në qytetin e Peqinit ka rënë pre e grabitjes mesditën e sotme. Mësohet se Skënder Zeqiri 76 vjeç është grabitur nga një çift bashkëshortësh, të cilët i kanë marrë nga banesa para dhe sende me vlerë. Ngjarja ka ndodhur rreth orës 11:30 në lagjen Cesmë.

Bashkëshortja e tij deklaron se nga banesa i kanë marrë 60 mijë Euro. Ajo rrëfen se në shtëpi në momentin e grabitjes ka qenë vetëm bashkëshorti sipas të cilit i është shfaqur në derë një vajzë e cila i ka kërkuar të futet në shtëpi për të përdorur tualetin.


"Unë jam e shoqja e Skënderit. Unë erdha në orën 1 se shkoj në treg me rrobat. O Skënder hap derën. Ai tha ca dere do ti, mua më kanë vrarë. Ai ishte në ballkon i shtrirë. Ishte një gocë dhe më tha do hyj pak në banjo dhe do urinoj. Te kuzhina kishin prish bravën dhe kishin marrë gjithë lekët. Kisha hequr lekët për furgonin. Në total kanë marrë diku te 60 mijë Euro. Mora celularin të merrja çunin. Mora celularin, nuk ma hapën. Morëm Skënderin dhe shkuam nga policia në spitalin e Peqinit", thotë bashkëshortja e Skënderit.

Sipas policisë çifti që ka shkuar në banesën e të moshuarit i ka dhënë këtij të fundit një pije për të humbur kujtesën dhe më pas kanë vepruar në qetësi për të grabitur shumën e parave dhe sende.

Pasi kanë marrë paratë dhe sendet me vlerë, grabitësit janë larguar në drejtim të paditur. Zeqiri, ka kërkuar ndihmën e fqinjëve të cilët e kanë dërguar në spital dhe kanë njoftuar policinë.

B.K./m.v./Shqiptarja.com
Komento