Për 10 vjet ndalohet prerja e
pyjeve hyn në fuqi Moratoriumi

Duke filluar nga dita e djeshme dhe deri në vitin 2026 do të ndalohet prerja e lëndëve drusore në të gjithë vendin, kjo sipas përcaktimeve të bëra në moratoriumin 10 vjeçar të pyjeve. Sipas këtij dokumenti të vetmet përjashtime që do të bëhen do të jenë ato në rastet e shfrytëzimit për dru zjarri.

Moratoriumi
Masa të rrepta dhe gjoba deri në 5 milionë lekë për të gjithë ata që do të dëmtojnë pyjet apo shfrytëzojnë ato. Këto janë penalitet që parashikon moratoriumi i pyjeve i cili ka hyrë në fuqi gjatë ditës së djeshme dhe do të zbatohet për 10 vjet. Ministri i Mjedisit, Lefter Koka e ka quajtur një vendim historik që do të ndryshojë të ardhmen e pyjeve. Ai ka kërkuar përfshirjen e qytetarëve për zbatimin e moratoriumit.

“Gjithashtu u kërkojmë të gjitha institucioneve shtetërore që janë ngarkuar për zbatimin e këtij ligji, angazhim maksimal për zbatimin me sukses të moratoriumit të pyjeve. Qëllimi i këtij ligji është që të reduktojë ndërhyrjet mbi fondin pyjor, të degraduar si pasojë e mbishfrytëzimit dhe dëmtimeve të tjera, me synim përmirësimin dhe rehabilitimin e gjendjes së tij”, ka deklaruar Koka. Sipas tij të gjitha kundravajtjet administrative do të gjobiten në vlerën 5 milionë lekë.

Çfarë parashikohet 
Dokumenti 10 vjeçar ka për qëllim ndalimin e veprimtarisë së shfrytëzimit të lëndës drusore në fondin pyjor publik/privat në të vendin. “Në bazë të këtij moratoriumi ndalohet kategorikisht ushtrimi i veprimtarisë së shfrytëzimit të lëndës drusore në fondin pyjor publik/privat në të gjithë territorin e Republikës së Shqipërisë. Po kështu ndalohet tregtimi i produkteve të tij, si dhe eksporti i lëndës së drurit të papërpunuar, lëndës së ndërtimit, drurëve të zjarrit si dhe i qymyrit të drurit” ka pohuar Ministri Koka.

Por, duket se moratoriumi ka lënë hapësira për ato bashki të cilat e kanë te nevojshme përdorimin e druve për ngrohje. “Përjashtohen nga shfrytëzimi i lëndës drusore për plotësimin e nevojave të banorëve të bashkive për dru zjarri, rastet e ndryshimit të destinacionit të fondit pyjor dhe kullosor referuar legjislacionit në fuqi si dhe shfrytëzimi i lëndës drusore për rigjenerimin, shëndetësimin e pyjeve  dhe pastrimin e mbetjeve drusore” thuhet në ligj. Sipas këtij të fundit, bashkitë dhe komunat do të kenë përgjegjësi direkte për menaxhimin e pyjeve dhe për furnizimin e popullatës me dru zjarri e cila duhet të ketë kosto sociale.

Çfarë ndalohet?
Ndalohet ushtrimi i veprimtarisë së shfrytëzimit të lëndës drusore në fondin pyjor publik/privat në të gjithë territorin e Republikës së Shqipërisë.
Ndalohet tregtimi i produkteve të tij.
Ndalohet eksporti i lëndës së drurit të papërpunuar, lëndës së ndërtimit, drurëve të zjarrit si dhe i qymyrit të drurit.

Çfarë lejohet?
Lejohet shfrytëzimi i lëndës drusore për plotësimin e nevojave të banorëve të bashkive për dru zjarri;
Lejohet shfrytëzimi i pyjeve në rastet e ndryshimit të destinacionit të fondit pyjor dhe kullosor referuar legjislacionit në fuqi,
Lejohet shfrytëzimi i lëndës drusore për rigjenerimin, shëndetësimin e pyjeve  dhe pastrimin e mbetjeve drusore.
 
Masat dhe penalitetet 
Shkeljet e këtij ligji, kur nuk përbëjnë vepër penale, por përbëjnë kundërvajtje administrative dhe dënohen me gjobë, në vlerën 5 milionë lekë. Afati i zbatimit të këtij ligji është 10 vite nga data e hyrjes së tij në fuqi.


Redaksia Online
(u.s/shqiptarja.com)