Për pak ditë do të jetë funksionale dhe do të hapet e plotë  autostrada Kukës-Morinë. Drejtoresha e Autoritetit Rrugor Shqiptar, Sonila Qato ka inspektuar punimet në 7 urat e ndërtuarat, të cilat kishin mbetur pa përfunduar prej vitesh. Sipas ARRSH, rruga do të jetë gati për qarkullimin e mjeteve pas pak ditësh, ndërkohë që po punohet për përfundimin e sinjalistikës, pasi çdo proces tjetër pune është mbyllur.

"ARRSH dhe Kontraktori po punojnë të organizuar në këtë vepër madhore dhe me intensitet të plotë këto ditë me qëllim që rruga të jetë e hapur për përdorimin e mjeteve shumë shpejt", shkruan Qato.

Segmenti nga Kukësi deri në doganën e Morinës ishte një nga pjesët e mbetura të papërfunduara të autostradës Durrës-Kukës. Problemi kryesor ishte mospërfundimi i 7 urave, të cilat pengonin lëvizjen e mjeteve në të dyja karrexhatat e rrugës. Gjithashtu, për shkak të mospërfundimit të këtij segmenti rrugor, kishte vështirësi në qarkullimin e mjeteve dhe shpesh janë shkaktuar dhe aksidente me pasoja fatale.