'Përgatitjet për Çekinë i nisa kur isha me pushime', Sylvinho në prag ndeshje: Mbase fitojmë! Gjimshiti: Europiani motivim i madh për mua

Kombëtarja shqiptare ka udhëtuar këtë të mërkurë në Pragë për sfidën përcaktuese kundër Çekisë, që vlen për kualifikueset e Europianit. Në Shqipëri ka mbetur mesfushori Qazim Laçi për shkak të gjendjes gripale, i cili është gjithashtu futbollisti i vetëm kuqezi që aktivizohet në kampionatin çek. Në prag të takimit, që luhet të enjten në orën 20:45 në stadiumin ‘Fortuna’, trajneri Sylvinho tregoi sesa kohë i ka marrë përgatitje e kësaj përballje delikate.

“Unë u riktheva në punë me 31 korrik, por kur isha me pushime kam parë 7 ndeshje të Çekisë. Janë rreth 1 muaj e gjysmë punë për të përgatitur këtë ndeshje. Kundërshtari luan me shumë skema dhe ka alternativa falë futbollistëve fizikë,”-u shpreh Sylvinho, trajner i kombëtares.

Më herët braziliani i kombëtares ka deklaruar se minimumi në këtë përballje është një pikë.

“Në këto momente jemi në gjysëm të rrugës dhe është shumë shpejt për të bërë llogaritë. Duhet ti marrim ndeshjet me rradhë dhe llogaritë ti bëjmë në nëntor. Na duhet të luajmë mirë për të marrë pikë. Mbase edhe mund të fitojmë, por mos harroni se kë kemi përballë,”-tha Sylvinho, trajner i kombëtares.

Ndërkohë Berat Gjimshiti mendon vetëm Europianin, pasi në 2016 Shqipëria shkoi në Francë me kontributin e tij, por në fund De Biasi nuk e përfshiu në grumbullim.

“Dua të arrij edhe njëherë kualifikimin. Është një motivim shumë i lartë. Dua të marr pjesë. Do japim gjithçka sepse janë ndeshje të rralla, me motivim të lartë. Sidomos për mua personalisht,”-deklaroi Berat Gjimshiti, futbollist i kombëtares.

Çekia është kryesuese e grupit E me 7 pikë, 1 më shumë se Shqipëria, ndërsa tre dit pas sfidës në Pragë kuqezinjtë do të presin Poloninë në Tiranë dhe konkretisht në ‘Air Albania.”

Ne.k./KT/Shqiptarja.com

TAG:
• berat gjimshiti
• sylvinho
• euro 2024
• kombetarja