Fermerët e prekur nga përmbytjet dhe dëmet e shumta në bujqësi kanë protestuar sot përpara Bashkisë së Maliqit.

Burime për Report TV bëjnë me dije se ata kërkojnë dëmshpërblim nga shteti, duke theksuar se dëmet e shkaktuara janë të mëdha dhe kanë prekur rëndë prodhimin bujqësor.

Protesta po monitorohet nga forca të shumta të Policisë, të cilat janë pozicionuar në hyrje të institucionit për të garantuar rendin dhe sigurinë.

Kujtojmë se i gjithë vendi pak ditë më parë u përfshi nga reshje të dendura shiu, të cilat shkaktuan përmbytje të shumta në disa zona të Shqipërisë.

Shumë toka bujqësore, kryesisht në qarqet Vlorë, Fier, Durrës, Lezhë, Korçë dhe Elbasan u prekën nga përmbytjet, duke bërë që prodhimet e fermerëve të shkojnë dëm.

Po ashtu, edhe shumë banesa në të gjithë Shqipërinë u zhytën nën ujë, duke krijuar problematika të mëdha për shumë familje.