Përmbytjet bashkojnë PS,PD e
LSI, Rama:Situatë e frikshme

Situata kaotike e krijuar nga reshjet e dendura të shiut të dy ditëve të fundit ka bashkuar politikën shqiptare. Përfaqësues të partive kryesore në vend janë bashkuar këtë paradite në qytetin e Fierit, ku gjendja paraqitet tepër e rënduar, për shkak të daljes së lumit Vjosë nga shtrati, i cili ka përmbytur shumë zona në Fier dhe Vlorë.

Kreu i Kuvendit, Gramoz Ruçi, deputeti i PD, Luan Baçi, dhe ai i LSI, Shezai Rrokaj, ndodhen tek “Ura e Mifolit” në Fier, ku gjendja është kritike dhe shumë banesa janë boshatisur, për shkak të rrezikut nga uji. Ndërkohë, ka mbërritur dhe kryeministri Edi Rama, i cili tha se situata ishte e frikshme dhe kaloi parashikimet. 

"Ishte shumë e frikshme situata pasi faktikisht e kaloi 2015 përtej parashikimit. Tani duke u nisur nga situata duhet që të vazhdojnë ndërhyrjet aty ku fatikisht identifikohet me domosdoshmëri”, tha Rama.

Kryeministri shoqërohej nga ministrja e Mbrojtjes, Olta Xhaçka, kryebashkiaku i Fierit, Armando Subashi, dhe kreu i Emergjencave Civile, Shemsi Prençi. Kryebashkiaku Subashi tha se ka më shumë prurje nga lumi se një vit më parë.

“Ka prurje më shumë se një vit më parë, por situata është më e qetë”, tha Subashi. Nga ana tjetër, Prençi deklaroi se sot pritet që situata të përmirësohet. “Hidrovorët kanë qenë në gatishmëri. Sot shpresojmë që situata të përmirësohet”, theksoi kreu i EC. 

Kryebashkiaku i Fierit, Armando Subashi, foli për Report Tv nga ‘Ura e Mifolit’, ku tha se situata pritet të përmirësohet duke filluar nga mesdita e sotme. Subashi deklaroi se pas orës 15:00 niveli i ujit do të fillojë të bie dhe situata do përmirësohet.

“Situata krahasuar me vitin 2015 është shumë më e mirë. Situata do fillojë duke u përmirësuar pas orës 13:00-14:00, dhe besoj që pas orës 15:00 do fillojë të bie niveli i ujit dhe situata besoj do përmirësohet. Më e keqja do të kalojë. Janë evakuuar të gjithë banorët në rrezik”, tha Subashi. 

(Deputetët Shezai Rrokaj i LSI dhe Luan Baçi i PD tek 'Ura e Mifolit')

d.c./shqiptarja.com

TAG:
• gramoz ruçi