Përplasja e re/ Berisha shmang
Arvizu: Lidhem direkt me DASH

TIRANE - Kryeministri Berisha nga kryeqendra e Veriut, Shkodra deklaroi se ka kontakte të drejtëpërdrejta me DASH dhe me qeverinë amerikane në Uashington. Në një takim me gazetarët e Shkodrës, kreu i mazhorancës ka treguar qartë se në kontaktet e tij me SHBA ai po shmang ambasadorin amerikan në Tiranë, Aleksandër Arvizu. “Nga unë pritet që të zbatoj me përpikmëri ligjet e vendit dhe ju duhet ta dini që ne jemi në kontakt të vazhdueshëm me Departamentin e Shtetit”, deklarohet Berisha kundër ambasadorit Arvizu.

Çka tregon se tashmë ai shmang të gjitha kontaktet me të dhe komunikon drejtëpërdrejt me DASH. “Qeveria shqiptare është në kontakte të vazhdueshme me qeverinë amerikane dhe ju garantoj se ka marrëdhënie shumë të mira. Dhe qeveria amerikane nëpërmjet zyrtarëve të lartë të Departamentit të Shtetit i ka bërë të qarta qëndrimet e veta, të qarta si kristali”, ka deklaruar kreu i qeverisë, një sinjal i qartë se marrëdhëniet e tij me ambasadorin Arvizu janë të akullta dhe dhënë idenë se qëndrimet që ai ka mbajtur përkundrejt qeverisë kanë qënë personale.

Teksa thotë se ka kontakte me qeverinë amerikane dhe se marrëdhëniet janë të mira me qeverinë amerikane, Berisha nxjerr jashtë lojë aktivitetin e ambasadorit aktual. Tërë acarimi i Berishës ka ardhur pas deklaratës së ambasadorit Arvizu sipas të cilit ditën e hënë përkrah 3 ligjeve, seanca parlamentare të zgjidhë dhe plotësimin e vendeve në KQZ. Kjo ka sjellë dhe deklaratën e fortë të Berishës në Elbasan.

“Ligjet e Shqipërisë janë shumë të mira. Janë ligje demokratike. Kështu që unë dëgjoj me shumë respekt mendimet e miqve por detyra ime është të zbatoj ligjet e vendit tim. Shqipëria ka institucione demokratike, që janë larg të qenurit të përsosura, por nuk ka zëvendësim për to. Kur fillojmë të bëjmë gjykatësin kushtetues, apo kur bëjnë gjykatësin e lartë apo atë të faktit, unë them se s’respektojnë veten e tyre. Cilido qoftë. Ky është një shtet i bazuar në ligje. Askush nuk ka mandat të interpretojë ligjet e një vendi tjetër . Askush s’ka mandat të marrë atribute, sepse mënyra sesi funksionojnë qeveritë e vendeve të lira është një mënyrë e mrekullueshme, është një mënyrë transparente”, reagon fort Berisha ndaj deklaratave të ambasadorit Arvizu.
Shkrimi u botua sot në gazetën Shqiptarja.com (print) 28.05.2013
 
Redaksia Online
(b.m/shqiptarja.com)

TAG:
• kqz