Personazh/ Thurja me thupër, zanati që i ka mbijetuar historisë! Pëllumb Hysa, zanatçiu që ktheu pasionin në përfitim: Kam bërë çanta edhe për ‘Dolce Gabbana’

Thurja me thupër është një nga artet e traditat më të bukura që ka arritur t’i mbijetojë kohës. Orë të tëra pune me dorë, përkthehen në mijëra produkte të veçanta të krijuara prej thuprës.

Pëllumb Hysa është mjeshtri korçar, i cili prej më shumë se 45 vitesh krijon art me thupër.

“Është një zanat që unë kam shumë dëshirë dhe pasion që të flas për të”, pohon mjeshtri.

I buzëqeshur dhe i apasionuar pas punës që bën, mjeshtri tregon fillesat e tij në këtë zanat të trashëguar brez pas brezi.

“Është një zanat që unë e kam trashëguar që nga gjyshi më pas nga babai. Një fëmijë që ti e dallon që në moshë të vogël që është ose për fizkulturë apo muzikë ose diçka tjetër, mua babai më ka mësuar thuprën dhe kjo është një dëshirë shumë e madhe nga babai. Kam filluar që në moshën 6 vjeç, dhe është 45 vjeç që kur isha 10 vjeç që unë punoja shumë bukur”, tha Pëllumb Hysa.

Fati i tij duket se ishte i shkruar që në thuprat e para që nisi të thurte.

“Nuk mund t’i harroj fillimet asnjëherë, pasi babai ka qenë nga të parët që hapi artistiken në Korçë edhe afër tij kur isha 6 vjeç, dhe më futi në një shportë, dhe kisha frikë se mos më shante por fillova të punoja. Aty afër ka qenë një zonjë që punonte dhe i ka thënë babait ‘Izet i duket dora do bëhet zanatçi’, kjo është një nga kujtesa më të mira që kam nga babai që në moshë të vogël”, shprehet për Report TV mjeshtri.

Biseda me mjeshtrin që tanimë ka eksperiencë prej 4 dekadash, realizohet nga gazetarja e Report TV Gladiola Hoxha, mes dhjetëra punimesh, nga shportat tek karriget.

Mjafton të kesh ëndrra e pasion dhe çdo gjë realizohet, shprehet mjeshtri teksa tregon një nga një të gjitha punët që ka realizuar me dorë.

“Mjafton që të kesh pasion, të kesh ëndrra dhe të nxjerrësh gjëra të bukura, fillon që nga dhomat e gjumit që kam arritur unë, janë shportat që janë mbi 100 modele të ndryshme, ka karrige, komplete me thupër për veranda dhe ato janë me qindra. Një komplet karrigesh, katër karrige dhe një tavolinë do një javë që të punosh. Çanta që ta përfundosh duhen 2 ditë ose ka shporta që më e thjeshta shkon një orë. Pra varet nga madhësia nga dendësia që ka apo edhe modeli”, thotë 56 vjeçari.

Zanatin që e ka pjesë të jetës, 56 vjeçari arrin ta realizojë me sy mbyllur, dhe përpos kënaqësisë dhe pasionit, krijimi me thupra i siguron edhe të mira materiale.

“Unë tani kam arritur deri aty sa të më mbyllësh sytë dhe shumicën e proceseve mund ta bëj edhe me sy mbyllur aq e lehtë është për mua tani në këtë moshë. Një fshat që duket nuk do kallauz. Puna e bukur vlerësohet dhe puna artistike vlerësohet dhe jam shumë i kënaqur”, tha ai.

Përveç të ardhurave, mjeshtri ka arritur të depërtojë deri në konkurset ndërkombëtare të zhvilluara në Francë, Gjermani e Itali, duke realizuar madje edhe çanta të Dolçe Gabanas.
 

“Pa lëvdata se nuk kam llafollogji shumë të madhe por kam vepra më tepër. Unë kam arritur të konkurroj deri në Francë, Gjermani me mjeshtra të mëdhenj, në Itali kam arritur, prapë me mjeshtra të mëdhenj, dhe kemi bërë disa çanta të ‘Dolce Gabanna’, si kjo që shikoni që nuk e kemi përfunduar”, pohoi mjeshtri.

Dëshira për ta trashëguar këtë art është e madhe, ndaj Hysi nuk e fsheh trishtimin për largimin e djalit të tij nga vendi.

“Do isha shumë i lumtur që djali, që është specialist por dëshira është shumë e madhe që pavarësisht se janë hapur këto rrugët për jashtë vendit dhe duan të ikin, por do kisha shumë dëshirë që djalin ta kisha këtu dhe të vazhdonte këtë punë” pohon ai.

Si çdo zanat edhe thurja me thupër ka sekretet e veta, ndërsa nga mënyra sesi e realizon thurjen me të 10 gishtat e duarve, varet cilësia e gjithë produktit final.

Ideja e të pasurit një dyqan në zonën më të frekuentuar të momentit në pazarin e Vjetër të Korçës, aty ku gjithçka lidhet me traditën, është ëndrra më e madhe e Pëllumb Hysës, por për sa kohë ai nuk ka ende  mbështetje, thotë se kjo do të mbetet thjesht një ëndërr. Deri në realizimin e saj, 56-vjeçari thotë se pasionin e tij do të vazhdojë ta ushtrojë në këto ambiente modeste.

M.Q./LR/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Investimi i dhëndrit të Trump në Sazan, jeni dakord?



×

Lajmi i fundit

Mero Baze: Marrëveshja e normalizimit” është shans për të normalizuar Lulizm Bashën dhe PD

Mero Baze: Marrëveshja e normalizimit” është shans për të normalizuar Lulizm Bashën dhe PD