Report Tv siguron videon, momenti kur efektivi qëllon disa herë me armë punonjësin e ERE! Ende në kërkim, 10 mijë euro shpërblim për kapjen e tij

TIRANË- Efektivi Erjon Goxhara, që plagosi inxhinierin e ERE-s në zonën e Komunës së Parisit në Tiranës, vijon ende të jetë në arrati, pavarësisht negociatave me kolegë e familjarë, përfshirë edhe një bisedë me thirrje për vetëdorëzim të kryepolicit të Tiranës, Tonin Vocaj.

Policia ka vendosur në dispozicion 10 mijë euro shpërblim për këdo që jep informacion që mund të çojë në kapjen e efektivit. Goxhara, baba i dy fëmijëve, lëshoi 6 plumba ndaj Lorenc Kostës, 45-vjeçarit ndaj të cilit kishte dyshime se i ngacmonte bashkëshorten.

Report Tv dhe Shqiptarja.com kanë siguruar pamjet e kamerave të sigurisë së një lokali, ku dallohet edhe momenti i plagosjes. Ora shënon 14:20, 19 gusht, dhe burri me të kuqe në trotuar është 45-vjeçari Kosta, me profesion inxhinier i punësuar te ERE (Enti Rregullator i Energjisë).

Para tij, sapo ka zbritur nga automjeti, del efektivi, i cili nxjerr pistoletën dhe nis ta qëllojë me plumba në këmbë, pranë rrethrrotullimit te komuna e Parisit.  Më pas Goxhara largohet me shpejtësi. 45-vjeçari mbetet i shtrirë në tokë, i mbuluar me gjak dhe ndihmën e parë ia kanë dhënë kalimtarë të rastit.

Dy akuza janë ngritur ndaj efektivit në drejtorinë e Kufirit në Laprakë, “Vrasja me paramendim”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”. Efektivi, baba i dy fëmijëve, dyshohet se fshihet në periferi të Tiranës, në zonën e Dajtit, ku janë përqendruar edhe kërkimet. Shkak për plagosjen dyshohet se është bërë një lidhje jashtëmartesore që Kosta kishte me gruan e efektivit. Sipas burimeve, edhe bashkëshortja e efektivit, punon  te ERE, në pozicionin e juristes. Pikërisht aty, efektivi dyshon se ka nisur një histori mes tyre.

Burime zyrtare thonë se janë marrë në pyetje familjarë të policit në kërkim, të cilët kanë dhënë shpjegime mbi konfliktin me 46-vjeçarin si dhe janë këqyrur të komunikimet elektronike. 6 gëzhoja janë gjetur në vendin e ngjarjes, ndërsa Kosta është plagosur në këmbë e në bark dhe ndodhet ende në spital. 

Dinamika e ngjarjes

Ngjarja ka ndodhur rreth orës 14:00 të 19 gushtit 2024. Efektivi 46-vjeçar ka vepruar me gjakftohtësi për të plagosur Lorenc Kostën. Policia tha zyrtarisht se plagosja ka ndodhur për 'motive të dobëta', por burime për Report Tv thanë se ka dyshime që 45-vjeçari kishte lidhje jashtëmartesore me bashkëshorten e efektivit, megjithatë kjo pistë nuk është e konfirmuar.

Lorenc Kosta ka qenë duke ecur në këmbë në afërsi të kompleksit ‘Kika2’, ndërsa efektivi i policisë ka qenë me makinë. Efektivi ka ndaluar dhe e ka qëlluar duke e lënë të plagosur. Pas kësaj i ka bërë foto të plagosuri, i cili ishte i shtrirë në trotuar dhe i mbuluar me gjak.

Pas ngjarjes së rëndë, Goxhara është larguar me mjetin e tij në drejtim të banesës së tij, ka marrë një çantë me vete dhe menjëherë është larguar. Dyshohet se ai është larguar drejt Dajtit, ku edhe janë përqendruar kërkimet e policisë.

Goxhara, më herët ka qenë komandant i repartit Shqiponja ndërsa së fundi punon në Drejtorinë për Kufirin dhe Migracionin në Tiranë, pozicion të cilin e humbi pasi menjëherë pas plagosjes, kryepolici Vocaj njoftoi largimin e tij nga radhët e uniformave blu.

I plagosuri Lorenc Kosta 

 

Autori, Erjon Goxhara, efektiv

Rendit zhvillimet sipas orarit:

Të Fundit Të Parat

SI.E./Shqiptarja.com

TAG:
• Tirane
• Erjon Goxhara
• lorenc kosta
• policia e tiranes