Plazhi i Divjakës është një prej bukurive natyrore më pak të dëmtuara nga dora e njeriut në vendin tonë.

Deti është i cekët dhe i shkëlqyer për pushime me fëmijë të vegjël dhe familjen. 

Ka një shtrirje prej 15 km, rërë të bardhë e kufizuar nga pylli me pisha dhe është një destinacion i frekuentuar nga mijëra pushues. 

Pamjet e fokusuara nga kamera e televizionit A1 Report në këtë vend turistik nuk kanë nevojë për shumë koment.

Edhe gjatë kulmit të sezonit është e mundur që të bëni ecje në këmbë dhe të gjeni pak privatësi. 

Pylli me pisha i Divjakës mbulon një sipërfaqe prej 1100 ha, 700 prej të cilave janë Park Kombëtar që prej 1966. 

Nga ana lindore pylli kufizohet me toka bujqësore dhe laguna e Karavastasë dhe në perëndim nga rripi me rërë i bregdetit. 

Ekosistemi brenda pyllit është i shumëllojshëm. 

Ky plazh ofron mundësi të shumta për sportet ujore, eko-turizmin, dashamirësit e natyrës dhe të zogjve. 

Shumë prej pushuesve e zgjedhin këtë vend pasi ka rërën kurative dhe është një prej plazheve me më shumë jod. 

Divjaka gjithashtu ofron edhe mundësi të tjera pushimi siç janë habitati i pelikanit apo pylli i gjelbër me pemë të larta shumëvjeçare. 

Shumë nga të intervistuarit janë shprehur se në këtë vend gjen qetësinë që çdo njeri kërkon në pushimet e tij, larg tymit dhe zhurmës së qytetit. 

Vitet e fundit Bashkia e Divjakës ka kryer disa investime të cilat e kanë bërë edhe më tërheqëse këtë zonë.

Edhe pse ka investime çdo vit ende ka për t’u përmirësuar në këtë vend.
 
Fillimisht në plazhin e Divjakës duhet investuar në infrastrukturë pasi ajo ndihmon në lëvizjen e turistëve dhe në mbarëvajtjen e bizneseve që operojnë në këtë zonë. 

Të pyetur nga A1 Report ata shprehen se ky sezon ka qenë më i mbarë se vitet e kaluara pasi temperaturat e larta kanë bërë që qytetarët të dynden drejt plazhit. 

Por, Divjaka ka edhe gatimet e saj tradicionale të cilat kanë në bazë prodhimet e detit siç është peshku, ngjala, apo frutat e detit.

Çdo gjë që shërbehet në restorantet në këtë zonë është bio pasi të gjithë furnizohen me prodhimet e fermerëve të Divjakës dhe fshatrave për rreth saj. 

Ky vend i mrekullueshëm ka nevojë për më shumë promovim dhe këtu duhet të vihen në lëvizje instancat kompetente, por edhe media duhet të japë kontributin e saj.

Redaksia Online
(f.s/shqiptarja.com)