Policët e rinj, Ministria:
Përzgjedhja sipas 4 kritereve

TIRANE- Ministria e Brendshme ka sqaruar sot procedurën e përzgjedhjes së punonjësve të rinj në shërbimin e Policisë Rrugore të Tiranës. Sipas kësaj ministrie, përzgjedhja e efektivëve është bërë nga nga një komision i përbërë nga drejtues të lartë dhe me eksperiencë të Policisë Rrugore, duke pasur parasysh katër kritere kryesore.
 
1.       Arsimin dhe për përgatitjen e tyre profesionale, me njohuri të përgjithshme për detyrat, organizimin dhe funksionimin e Policisë së Shtetit;
2.       Vlerësimet e treguesve të punës për çdo punonjës në sektorin apo komisariatin ku kanë punuar deri tani;
3.       Përgatitjen fizike dhe moshën e re, për t’ju përshtatur sa më mirë ngarkesës së punës në trafikun rrugor;
4.       Barazinë gjinore, duke shtuar një numër të caktuar të policeve femra në këtë shërbim.
 
Ndërkaq, ministria e Brendshme sqaron se deri më tani efektivi i Komisariatit të Policisë Rrugore në kryeqytet është rinovuar me 6 oficerë të Rolit të Parë Drejtues dhe me 53 oficerë të Rolit të Parë Zbatues.
 
Sipas njoftimit, “me ndryshimet e bëra, mosha mesatare e këtij komisariati është ulur nga 47.4 vjeç që ishte deri dje, në 33.2 vjeç. Për nga arsimimi, oficerët e Rolit të Parë Drejtues janë të gjithë me arsim të Lartë në Akademinë e Rendit Publik dhe disa me arsim të lartë jopolicor në degët si: Inxhinieri mekanike, juridik, psikologji, etj”.
 
Ndërkaq, theksohet se “që prej ditës së sotme të gjithë efektivat e rinj janë pajisur edhe me bazën e nevojshme materiale, përfshirë jeleket fosforeshentë dhe kanë nisur me ritëm të mirë punën sipas një plani masash për reduktimin e aksidenteve dhe ofrimin e një shërbimi cilësor për qytetarët”.

Redaksia Online
(e.s/shqiptarja.com)