Polici hero që 'fle' me uniformë, pasioni i 29-vjeçarit çoi në kapjen e grabitësit (VIDEO)

Në një skenë të denjë për filmat aksion, në më pak se një minutë, dy persona me skafandra në kokë dhe doreza në duar, grabitën 60 mijë dollarë në qendër të Tiranës, në 'Rrugën e Barrikadave'. Një kambist, Agron Shima, ra pre e grabitësve që e përplasën fillimisht me motor dhe më tej e lënduan me thikë dhe levë duke i marrë lekët dhe duke e lënë të plagosur në tokë. Arratia e njëri prej grabitësve ka zgjatur shumë pak, falë ndërhyrjes së guximshme të dy efektivëve të Policisë Rrugore në Tiranë, të cilët arrestuan drejtuesin e motorit, por pasagjeri arriti të largohej bashkë me paratë e grabitura.

***

Agron Shima sapo doli nga Exchange i tij në "Rrugën e Barrikadave", me 60 mijë dollarë, kur u sulmua nga dy personat e kamufluar me kapuç e doreza. Paratë ai do t'i çonte pranë një banke të nivelit të dytë.

Grabitja ndodhi në sy të qindra qytetarëve të cilët fillimisht e raportuan në polici si një aksident rrugor, për shkak se Shima u godit nga pas nga motori i dy autorëve. Më pas u godit me thikë dhe me levë në kokë. Shima ka rënë në tokë pa ndjenja në tokë dhe mori ndihmën e qytetarëve deri në mbërritjen e ambulancës. Si rrallë herë kohët e fundit, kur qytetarët zgjedhin të nxjerrin telefonat celularë për të filmuar, duke qëndruar indiferent, këtë radhë janë munduar t'i japin ndihmën e parë kambistit të lënduar.

Vëmendja dhe reagimi i shpejtë i dy efektivëve rrugorë të cilët ishin në krye të detyrës në Rrugën e Barrikadave, pranë vendit të ngjarjes, bëri të mundur pikasjen e autorëve.

Shqiptarja.com mëson se efektivët F.H dhe O.Zh, kanë parë motorin teksa bënte lëvizje të çrregullta në rrugë. I kanë bërë shenjë të ndalojë, por kanë hasur në refuzimin e tyre për tu ndalur. Dy efektivët e rinj në moshë, i janë vënë në ndjekje motorit duke ju hedhur sipër grabitësve. Njërin prej tyre arritën ta neutralizojnë duke i vënë prangat dhe duke i sekuestruar edhe thikën dhe një levë që ai mbante. Ndërsa pasagjeri në motor, mundi të largohej. Megjithatë, ai është identifikuar nga policia dhe është shpallur në kërkim. Një 36-vjeçar nga zona e Alliasit.

Efektivët e Policisë Rrugore të Tiranës  i janë hedhur sipër motorit, ku mësohet se njëri prej tyre, me inicialet O.Zh, ka mbetur edhe i lënduar në dorë në tentativë për të ndalur grabitësit. Është rrëzuar nga motori në ecje, bashkë me autorët dhe janë zvarritur 2-3 metra. Aty punonjësit e policisë rrugore kanë shtrirë në tokë një nga autorët i cili më tej është shoqëruar në polici.

Fotoja e dy efektivëve të guximshëm u publikua edhe nga Policia e Shtetit, ku shfaqte pikërisht momentin kur autori ishte ndalur. Gjatë përleshjes me patrullën Rrugore, dy grabitësit kanë kërcënuar me thikë edhe një nga efektivët e policisë, por reagimi i tyre ka qenë i menjëhershëm, duke rrëzuar fillimisht motorin e autorëve dhe më pas prangosjen e njërit prej tyre.

Njëri prej efektivëve është vetëm 29 vjeç. Dhe është pikërisht personi që ndodhet mbi trupin e autorit teksa e mban të neutralizuar. Ka tre vite në Policinë e Shtetit. Ka punuar në komisariate të Rendit, dhe tashmë prej 9 muajsh është punonjës në Komisariatin Rrugor të Policisë së Tiranës. Kolegët e njohin për një njeri mjaft të guximshëm, por mbi të gjithë me një pasion të rrallë për profesionin e tij. Nëse do të ishte mundësia, do të qëndronte gjithë ditën me uniformën e policisë veshur - tregojnë kolegët dhe njerëz të afërt të tij. I drejtuar nga pasioni i madh për uniformën, e sheh veten gjithnjë e më lart në karrierë. E duket se kjo është një shenjë shumë e mirë për rrugëtimin e tij në Policinë e Shtetit.

Shqiptarja.com publikoi e para gjatë ditës së sotme dinamikën e ndërhyrjes së efektivëve rrugorë për të kapur autorët dhe reagimet e qytetarëve ishin të shumta. Shprehin krenari dhe respekt për këta djem të policisë, duke i quajtur heronj që me veprimin e tyre, ndikojnë sadopak në rikthimin e besimit të qytetarëve tek policia. Shumë i kanë quajtur nderi i policisë shqiptare, dhe kanë kërkuar që ata të vlerësohen.

 

Motori i përdorur në këtë ngjarje nga grabitësit ishte pa traga dhe dyshohet se dy të rinjtë janë pjesë edhe e disa vjedhjeve me dhunë të ndodhur në Tiranë vitin e shkuar.

G.M./Shqiptarja.com

TAG:
• grabitet kambisti
• Agron shima