BUJANOC - Sipas policisë serbe, në orët e hershme të mëngjesit të sotëm, është shtënë me rafale automatiku mbi punktin policor në fshatin Dobrosin 17 km në perëndim të Bujanocit. 
Sulmi sipas dëshmitarëve dhe banorëve ka zgjatur njëzet minuta në drejtim të pikë kontrollit kufitar serb, me ç’rast baraka e policisë dhe disa automjete të parkuara në afërsi kanë pësuar dëmtime serioze, ndërkohë që nuk mësohet për humbje në njerëz.

“Sulmi mbi policinë, respektivisht punktin policor, në orën 3:00, ishte akt terrorist”, ka thënë zëdhënësi i policisë së Vranjës, Dragan Stamenkoviq, duke shtuar se në këto momente nuk është në gjendje të komunikojë të dhënë të tjera për këtë sulm, raportojnë mediet serbe. 

Ky incident ka shkaktuar reagimin e përfaqësuesve politik dhe institucional të shqiptarëve të Luginës. Jonuz Musliu Kryetar i Kuvendit Komunal në Bujanoc, duke e gjykuar këtë incident e ka trajtuar si tendencë për përkeqësimin e gjendjes politike në mënyrë që politikan të caktuar serb të përfitojnë në
prag të zgjedhjeve presidenciale.

E kontaktuar për këtë rast, Policia e Kosovës nuk e ka pohuar dhe as mohuar këtë, duke thënë se bëhet fjalë për një shtet tjetër, andaj nuk janë të interesuar të japin asnjë koment.

/rg/shqiptarja.com/