Pollo: Dekriminalizimi, në janar
nis zbatimi me praktikën më të mirë

“Pas rikthimit në Parlament, dhe votimit në mënyrë unanime të rezolutës për dekriminalizimin e Kuvendit, në janar do të nisë projekti konkret i zbatimit të saj”. Kështu ka deklaruar deputeti i Partisë Demokratike dhe një nga negociatorët e marrëveshjes për rikthimin e opozitës në Kuvend, Genc Pollo në një intervistë në studion e televizionit A1 Report.

Ai ka shpjeguar rëndësinë e kësaj rezolute të firmosur dhe votuar unanimisht nga të dyja palët, dhe se hapat konkrete për realizimin e saj, do të nisin që në seancën e parë parlamentare të 19 janarit 2015.

Por për mënyrën e realizimit të dekraminilazimit të Kuvendit, Pollo thekson se do të ketë një këshillim nga faktori ndërkombëtar me praktikat më të mira. Megjithatë Pollo nënvizon se është i nevojshëm një ligji për të përcaktuar filtra konkretë, për personat me të shkuar kriminale që janë pjesë e administratës apo Kuvendit të Shqipërisë.

“KE ka filluar nga puna për të hulumtuar praktikat më të mira të vendeve anëtare të BE, në mënyrë që të na këshillojë me një formulë. Nuk e di se çfarë po mendon PS, sepse mund të jetë e shtangur që mazhoranca të votojë për dekriminalizimin e Kuvendit.”- tha Pollo.



Sa i përket marrëveshjes së arritur mes palëve, Pollo shprehet se për atë ishte rënë parimisht dakord që 24 orë më parë, kur mazhoranca dhe opozita zhvilluan takime me eurodeputetin Kukan, por se tre raundet e negociatave u bënë për të detajuar draftin i cili më pas u kthye në rezolutë.

“Ramë dakord që 24 orë më parë, me deklaratën e parimeve. Ishte baza për ta kthyer në rezolutë, dhe negociatat ishte në çshkallë do ta detajonim në disa aspekte dhe procedura të veçanta, dhe kjo na bëri të gjenim një vijë të mesme që e mbyllëm në mesnatë.”- tha Pollo.

Intervista e plotë e Genc Pollos në A1 Report
Pas më shumë se 5 muajsh opozita u rikthye në parlament, në seancën e fundit parlamentare, pas një faze të gjatë negociatash edhe me ndërmjetësimin e ndërkombëtarëve Kukan dhe Fleckenstein. Një nga negociatorët ishte edhe zoti Genc Pollo. Është folur për 3 raunde negociatash, pse kaq të gjata?
Dhe aq të gjata nuk kanë qenë, sepse është një çështje e rëndësishme. Unë them se shumë nga gjërat ishin mbyllur, por bëhej fjalë vetëm për detaje. Akordi ishte arritur 24 orë më parë me deklaratën e parimeve. Të nesërmen filluam punën për ta kthyer në rezolutë.
 
Pse ishte aq e vështirë?
Sepse ato pak gjëra, mund të biesh dakord menjëherë ose jo dhe kërkoi disa raunde. Problem ka qenë se nuk ramë dakord për një vit. Ky ishte shqetësimi i opozitës. Janë detyrime të ligjit që nuk u zbatuar nga qeveria. Patëm dhunë ndaj deputetëve, dhe pati një masë ekstreme siç është bojkoti.
 
E keni fjalën për persona me precedentë në Parlament?
Po dhe ky ishte edhe thelbi i akordit politik, e cila ishte përpjekja për të filluar me masa konkrete për të filluar dekriminializimin e parlamentit.

Vetëm PS e ka këtë problem?
Ky problem mund të jetë gjithandej por PS e ka demonstruar në të gjitha mënyrat, dhe po infekton edhe shtetin shqiptar duke emëruar persona me precedentë penalë, në poste kyçe në shtet. Ky është një problem që vetëm vitin e fundit e ka marrë një përmasë të tillë. Ka edhe çështje të tjera, që vendimet e gjykatës të respektohen, që ndihmojnë shtetin shqiptar dhe të gjitha qeveritë që vijnë ti zbatojnë.



Shumë pyesin nëse ka deputetë me precedentë pse nuk bëhen publike emrat. Si do bëhet ky dekriminalizim?
Ne po punojmë për të përgatitur një koncept. KE ka filluar nga puna për të hulumtuar praktikat më të mira të vendeve anëtare të BE, në mënyrë që të na këshillojë me një formulë. Nuk e di se çfarë po mendon PS, sepse mund të jetë e shtangur që mazhoranca të votojë për dekriminalizimin e Kuvendit. Nuk besoj se opozita e ka mbyllur gojën për emra konkretë, ata dihen, por ky është një problem që po bëhet i përgjithshëm. Mund të nisemi nga emra të veçantë, por problemi po bëhet sistematik dhe kërkon një rishikim të ligjeve dhe vullnet politik. Avantazhi i qeverisë është se nuk do të jetë vetëm fjala e dhënë, apo votimi 100% i rezolutës, kemi edhe për fat të mirë, edhe një angazhim të Brukselit dhe kjo është e shkruar edhe në rezolutë, edhe në komunikimet që kemi.

Do të propozoni një ligj për të përcaktuar kritere të sakta?
Mendoj se ka nevojë për një ligj por është ende herët. Duhet që të zbatohet ligji. Rezoluta flet për ata që kanë poste, si dhe për ata që pretendojnë poste, që të ketë filtra më konkretë.
 
Të gjitha nismat ligjore përfundojnë brenda qershorit.
Ne kërkuam një afat 3 mujor dhe gjatë negociatave shkoi 6 muaj. Ne donim një afat, dhe përderisa jemi angazhuar që të marrim këshillat e ndërkombëtarëve morëm parasysh edhe axhendën e tyre.
 
A do të ketë, fuqi prapavepruese apo nis që aty?
Kjo është diçka që ekspertët, asistenca evropiane, dhe qëndrimi i mazhorancës, që u djeg shumë më tepër, dhe besoj ditën e parë të sesionit në 19 janar do të sqarohemi për këto gjëra. Sepse parlamenti do të nisë me këtë gjë.




Lind pyetja, për kërkesat tuaja, duke qenë se kishit rënë dakord, pse opozita bëri propozim të ndryshimit të draftit?
Deklarata e parimeve që u hartua nga Kukan dhe Fleckenstein, ramë dakord që 24 orë më parë. Ishte baza për ta kthyer në rezolutë, dhe negociatat ishte në çshkallë do ta detajonim në disa aspekte dhe procedura të veçanta, dhe kjo na bëri të gjenim një vijë të mesme që e mbyllëm në mesnatë. Ndryshimet kishin të bënin jo me pikat, baza ishte e njëjtë dhe kjo e bëri të lehtë për palët, vetëm se ramë dakord për detajimet. Ajo që ishte e rëndësishme ishte vendosja e afatit. Vendimi kryesor ishte marrë 24 orë më përpara sipas propozimeve të eurodeputetëve dhe mbi atë bazë punuam.

Meqë e përmendet ardhjen e eurodeputetëve, një nga pikat që propozuat, është edhe marrja e rolit monitoruesit nga ana e Brukselit. A ka kërkuar opozita që PE të marrë një rol monitorues?
Patjetër, e para parlamenti evropian, në kuadër të MSA ka marrëveshje monitoruese me të gjitha vendet. Në rastin specifik ne patëm një angazhim të PE, të cilët do ta ndjekin atë dhe vetëm kjo do të ishte mënyra. Nëse do të ishim një vend me qeveri të pjekur, dhe jo me këtë kryeministër, nuk do të ishte e nevojshme.
 
E njëjta gjë ka ndodhur edhe kur ishte e kundërta. U desh ndërhyrja e ndërkombëtarëve?
Po por duhet parë edhe objekti i ndërhyrjes. Rama nuk njihte rezultatin e zgjedhjeve. PD e ka njohur rezultatin dhe ka hyrë në parlament. Ne kërkojmë zbatimin e shtetit ligjor dhe mbi këtë bazë qëndruam. Raporti i OSBE thanë se zgjedhjet ishin të rregullta. Tani 5 vjet më vonë kemi një Kushtetutë që përgjithësisht është respektuar, dhe tani vjen Rama dhe Meta dhe nuk duan ta bëjnë më. Kjo është e rëndë në vetvete, dhe nëse i mohon të drejtën opozitës, imagjino me një njeri të thjeshtë, duke i futur në burg, pa thënë se ligji duhet të zbatohet dhe detyrimi duhet të shlyhet. Siç kam pasur unë rastin kur një e papunë ka kamatëvonesa dhe sikur të shesë shtëpinë nuk i paguan, dot është çnjerëzore që ta kërcënosh.



Jeni i kënaqur që rinisi një jetë parlamentare normale?
Besoj se po sepse vendi i deputetëve është në parlament dhe të vjen keq që në 2014 të përdorësh metoda që kanë qenë në dekada të mëparshme. Por mendoj me një ndryshim tjetër pushtetit, shkalla e mazhorancës do të ishte që ta zgjidhte vetë. Kjo bëhet duke mos krijuar probleme, dhe kjo bëhet duke repsketuar të drejtat e opozitës, dhe kur shumë persona janë me precedentë, apo persona të caktuar ndërhyjnë në përzgjedhjen e krerëve dhe posteve.
 
Ndërkohë mazhoranca thonë që ishin plotësuar të gjitha kushtet që kërkonit.
E para ka pasur një mungesë serioziteti nga Rama i cili thoshte se nuk e di se çfarë kërkojnë, shkoi në Bruksel e tha që jam i gatshëm t’i realizoj kërkesat po të di se çfarë janë ato. Opozita i formuloi qartë kërkesat e veta. Hapat për dekriminalizimin e Kuvendit. Dhe e dyta Komisionet Hetimore dhe vendimet e gjykatës. Nëse këto çështje janë zgjidhur kur erdhi presioni nga Brukseli atëherë duket serioziteti i mazhorancës. Dekriminalizimi ishte problem shumë i madh ku pas korrikut dhe dhunës ndaj deputetëve është lajtmotivi i opozitës, por çështja ishte kaq e madhe sa ja ka vlejtur për sensibilizim.
 
Zoti Fleckenstein shprehet se nuk është i sigurt që kultura apo bojkoti ka përfunduar si qasje në Shqipëri, ju si mendoni?
Pa qenë fallxhorë shpreh dëshirën që kjo të mos ndodhë dhe mazhoranca të mos provokojë. Ne në janar do të nisim hapat konkretë për dekriminalizimin e Kuvendit. Supozimet tjera nuk mund ta di. E dyta, sa i përket deklaratave të Fleckenstein, mendoj se e kuptoi se ky bojkot i PD nuk mund të krahasohet me bojkotet e Ramës se nuk njihte rezultatin e zgjedhjeve, por ishte për të vendosur shtetin e së drejtës prandaj pati edhe përkrahjen e Brukselit. Ndryshe po të ishte për të pranuar dështimin elektoral nuk do të gjente mbështetje siç nuk gjeti bojkoti i Ramës. Këtë e kam dëgjuar nga vetë ata që ka gjëra që nga larg duken njëlloj por nuk janë njëlloj. Pra bojkoti i PD ka ngritur çështje të rëndësishme.

Sa i përket përdorimit të 3/5 të votave, nga mazhoranca nuk mund t’i përdorë për çështje që kanë nevojë për konsensusin e opozitës. Keni rënë dakord se për cilat çështje?
Jo nuk kemi rënë dakord, por ajo që dimë ne si reforma e ndarjes territoriale, që nga koha e PPSH dhe këto 25 vjet janë bërë me konsensus. Në sajë të numrave që arriti me joshje me vjedhje, i bëri pa tentuar një konsensus me opozitën. Ne dimë gjërat që mazhoranca ka bërë keq duke abuzuar me numrat, dhe tashmë në sajë të Brukselit, kjo u shndërrua në një qëndrim zyrtar të PS dhe PE, dhe u kthye në një rezolutë që u miratua pa vota kundër.



Ju thatë ne dimë ato që mazhoranca ka bërë keq, por mazhoranca i di?
Duke parë këto gjëra që po ndodhin duhet të ketë një zë të rëndësishëm kundërshtues, dhe do të duhej të ngrinin zërin e tyre.

Edhe një gjë të fundit, që në 24 dhjetor, keni miratuar të gjithë bashkë, një ligj për trajtimin e deputetëve, që parashikon rritje të pagave. Tregon kjo që kur është puna që kur ka interes të përbashkët bini dakord?
Kjo ka qenë një projekt i mazhorancës dhe opozita nuk ka marrë pjesë. Qëndrimi i Kuvendit ishte se nuk ka shumë shpenzime shtesë. Nëse mazhoranca ka rritur rrogat dhe dietat kjo shkon në kundërshtim me premtimet e kësaj qeverie. Unë shpresoj se të jetë korrekte ajo që ka thënë zyra e Kuvendit, për një projekt të balancuar. Unë thjesht e kam shfletuar dhe e kemi votuar a priori. Nuk është se u analizua kjo gjë. Por përsëris, nëse ka rritje të konsiderueshme të buxhetit për shpenzimet të deputetëve është e padrejtë, kur popullit i kërkohen kamatëvonesat e energjisë dhe kështu me radhë që janë nën presion që vijnë nga taksat e rritura.

Redaksia Online
(a.h/e.c/shqiptarja.com)

TAG:
• OSBE