'Pranvera me një lule s'vjen', artistët në karantinë, i këndojnë atdheut dhe natyrës

Akrobatja e Cirkut të Tiranës Eris Dakli ka dhuruar disa momente argëtimi nga shtëpia e saj për të gjithë fëmijët që i mungon cirku gjatë këtyre ditëve.
Së bashku me familjen e saj, që ka qenë 'mbështetësja' e saj gjatë ditëve kur kolegët e Cirkut mungojnë, Dakli ka ekzekutuar disa numra që të gjithë fëmijët mund t'i bëjnë me familjarët e tyre në shtëpi.

Edhe fëmijët janë bërë pjesë e luftës kundër koronavirus me krijimtarinë e tyre.
Vogëlushja Anja ka treguar për të gjithë mënyrën e përgatitjes së një maske në kushtet e shtëpisë.

Një nga këngët më të njohura për atdheun, "Për ty atdhe", vargjet e të cilave kanë frymëzuar breza të tërë për tu bërë qytetarë më të devollshëm, është risjellë edhe një herë nga artisti Sidrit Bejleri dhe banda e Mario Dedës.
Kjo këngë vjen në kuadër të nismës së shumë artistëve për të sjellë art nga shtepitë e tyre, në kohën kur koronavirus ka pezulluar çdo aktivitet kulturor.
'Për ty atdhe' është kënduar fillimisht nga artisti me zërin brilant Mentor Xhemali.

Banda e Mario Dedës dhe këngëtarja Egzona Ademi kanë sjellë nga karantina një nga këngët më të bukura shqiptare dedikuar dashurisë.
Në një 'koncert virtual' ata i dedikojnë të gjithë shqiptarëve në shtëpitë e tyre këtë këngë, si mesazh se dashuria duhet të jetë elementi me të cilin të ndërtohen marrëdhëniet njerëzore jo vetëm në kohën e koronavirus.

Pranvera nuk vjen me një lule, por ardhja e saj simbolizon një jetë më aktive dhe njerëz që i gëzohen rrezeve të diellit.
Edhe pse fillimi i pranverës 2020 i ka gjetur njerëzit brenda në shtëpi, duke iu gëzuar rritjes së temperaturave vetëm nga ballkoni i shtëpive, muzika nuk ka munguar.
Nga karantina, Luiz Ejlli i rikthehet muzikës duke kënduar këngën "Pranvera me një lule s'vjen", i shoqëruar nga banda e Mario Dedës.